DAVAO CITY -- Giduso sa mga kapartido sa Hugpong ng Pagbabago (HNP) nga mahimong national party atol sa nahitabong 2nd general assembly niadtong Huwebes, Enero 25.
Apan, sumala ni Mayor Sara Duterte-Carpio nga ipalahi una ang maong plano samtang wa pa mahuman ang 2019 midterm elections.
Si Mayor Sara, kauban ang lima ka gobernador sa Davao Region maoy nagmugna sa HNP sa miaging tuig apan nagpakita og dakong suporta sa 12 ka mga kandidatong senador sa administrasyon ni Presidente Rodrigo Duterte.
Ang HNP narehistro sa Commission on Elections niadtong Hulyo 2, 2018, isip regional political party.
“We can truly see if HNP is effective after the election if we make administration senators win,” asoy ni Sara sa mga opisyal ug lokal nga kandidato gikan sa Davao Occidental, Davao del Sur, Davao Oriental, Davao del Norte, Davao de Oro (Compostela Valley) ug Davao City, sud sa SMX Convention Center.
Matud sa mayor nga ang mahimong desisyon sa HNP mag-depende unya sa mayorya sa mga sakop niini.
Sa pakighinabi sa mga tigbalita, gibutyag sa mayor nga magpabilin una nga rehiyonal nga partido ang HNP bisan og nakig-alyansa na kini sa ubang mga nasyonal ug lokal nga partido aron mabutang sa puwesto ang mga kandidato sa administrasyon.
Samtang, si Davao Occidental Governor Claude Bautista nga mao ang HNP regional president, nagbutyag nga mokabat na sa 10 ka nasyonal ug lokal nga partido ang ilang kaalyado lukop nasud.
Gipabuhagay niini nga tumong sa partido nga ikampanya ang 12 ka mga kandidatong senador ug kini ang mahimong basehan kon angayan ba nga mahimong national party.
Sa kasamtangan, gi-endorso sa HNP ang mga kandidato nga sila kanhi Special Assistant to the President (SAP) Christopher Lawrence “Bong” Go, kanhi Philippine National Police (PNP) chief Ronald dela Rosa, kanhi Presidential adviser Francis Tolentino, Maguindanao Rep. Zahid Mangudadato, Senador JV Ejercito, Jinggoy Estrada, Sonny Angara, Cynthia Villar, Taguig Rep. Pia Cayetano, Ilocos Norte Governor Imee Marcos, ug kanhi Malacañang spokesperson Harry Roque.
Atol sa asembliya, gi-amendahan sab sa partido ang ilang constitution and by-laws hinungdan nga natawo ang planong mahimong nasyonal nga partido. (Orlando B. Dinoy)