BALHOG karon sa Sasa Police Station ang usa ka 56-anyos nga lalaki human iyang gilugos ang 13-anyos nga batang babaye niadtong Huwebes, Enero 24, sa Upper Malagamot, Barangay Panacan, Davao City.
Ang suspetsado giila nga si Leo (bansagon gitago sanglit wala pa napasaka ang kaso), minyo, mag-uuma ug residente sa maong dapit, samtang giila ang biktima nga usa ka alyas Mara, 13, Grade 6 pupil ug residente sab sa maong dapit.
Sa pakighinabi ngadto sa suspek, iyang giangkon ang salaud diin nahimo niya ang pagmolestiya sa biktima sanglit migakos kini kaniya dihang iyang nabira atol sa ilang pagpangatulog.
Nasayran nga gisalig ang biktima sa iyang mga ginikanan ngadto sa suspetsado ug mapasagdan nalang nga sa balay sa suspek kini makatulog.
Una niini, tungang gabii niadtong Huwebes, samtang natulog ang biktima sulod sa ilang panimalay kalit na lamang misulod ang suspek nga hubog ug kalit na lamang gibira ug gihuboan ang biktima.
“Nidikit man sa akong pagbira, mao tong nahitabo gyod kay miinit man pod ang iyang lawas, miinit sab ang akoa,” saysay sa suspek kinsa nahinabi sa mga tigbalita, Biyernes, Enero 25.
Buntag pa lamang, miadto ang suspek sa balay sa biktima ug nananghid sa ginikanan niini nga kuhaon niya ang bata ug himuon nga asawa kay nahilabtan niya ang pagkababaye niini.
Sa pagkabalo sa apohan ug amahan labot sa insidente, uban sa purok lider sa lugar miadto sila sa kapulisan kauban ang biktima aron magpakitabang resulta sa pagkadakop sa suspek.
Daghang mga netizens ang mipadayag og komento human ma-post ang interview sa suspetsado.
Ang netizens nagsaysay nga lagmit di na maabtan og usa ka semana ang kinabuhi sa suspek gumikan sagad sa mga ingon niini nga insidente labi na og ang Sasa Police Station ang makasikop, mamatay gayod ang suspek gumikan mosukol kini.
Una niini, nagpahibalo nang daan ang Davao City Police Office nga kung maipit na ang kinabuhi sa pulis sa pagsukol sa suspek, ilaha gayod kining iniyutralisa.
Apan ang DCPO maampingon sa ilang mga piniriso ug makanunayong mitahod sa pagpatuman sa balaud.