ANG mga pulis ug social workers magtulodtulod kinsay mokupot sa mga bata nga madakpan kay nakahimo og krimen.
Ang pulis mahadlok tungod kay gikinahanglan nila ibalhin ang kustodiya sa mga bata ngadto sa social workers.
Sagad mahitabo kini kon dunay bata nga madakpan lapas na sa alas 5 sa hapon.
Mao kini ang sulti ni Atty. Noemi Abarientos, presidente sa Children’s NGO Network.
Giaprobahan niadtong Lunes, Enero 21 sa House of the Representatives ang balaodnon nga nagpaubos sa Minimum Age of Criminal Responsibility (MACR) gikan sa 15 anyos ngadto sa 9 anyos ug dayon giusab ngadto sa 12 anyos.
Matod ni Abarientos, nangita lang og lusot ang administrasyon aron makadakop ang mga pulis og mga bata nga gigamit paghimo og krimen, ilabi na kon kini naglambigit sa ilegal nga drugas.
“Ang ilang buhaton para ma divert ang issue nga ang sad-an bata. Di sila kay wa sila naka perform sa ilang function. Ilahang isika kay kunuhay badlungon nila kuno ang mga bata, but actually, children are just be children,” pasabot niya sa Superbalita Cebu.
Ilang gihulagway ang maong balaudnon nga immoral ug di sakto sanglit di angay basulon ang mga bata sa ilang kapakyasan sa pagsunod sa mga balaod sa nasud.
Dugang ni Abarientos, ang mga bata maoy mag-antos sa silot sa kaso samtang ang mga hamtong nga nagpaluyo magpabiling gawasnon.
“Dili tanang mga LGUs (local government unit) naay pareha sa Cebu City nga Operation Second Chance. Dili tanan nga mga municipalities naay kabutangan. Maglalis ang mga pulis ug social workers kinsay mohupot sa bata at the time nga naghuwat pa siya sa imbestigasyon,” niingon si Abarientos.
Kon mahimong balaod ang pagpaubos sa minimum age of criminal liability, modaghan na sab unya ang mga kaso nga kinahanglang husayon sa korte.
Apan way probisyon sa balaud nga magpuno og dugang mga huwes. Sigon niya nga wa silay nakita nga rason aron paubsan ang criminal age of responsibility.