NAPUN-AN og 7,728 ka mga lolo ug lola ang listahan sa Office of Senior Citizens Affair ( OSCA), kinsa kwalipikadong makadawat sa P12,000 karong tuiga.
Kini ang gibutyag ni Lourdes Limpangog, pangulo sa Osca, human ilang gikarga ang mga aplikante gikan sa Marso-Disyembre 2018, hangtod sa Enero 23 karong buwana.
Sa kinatibuk-an, niabot na og 75,028 ka senior citizens ang makadawat sa binuwan nga financial assistance gikan sa 67,300 sa miaging tuig.
Sila makadawat og tag P2,000 karong Pebrero 2, Sabado, sa ilang tagsa-tagsa ka barangay.
Si Limpangog niingon nga nahurot na nila og karga ang anaa sa ilang waiting list ug kadtong mo-apply sugod kagahapon, posibleng maapil sa hinabang para sa Marso.
Ang City Governnment nigahin og tag P12,000 sa 75,500 ka lolo ug lola para sa 2019.
Giawhag sa Osca chief nga kobrahon ang ilang tag P2,000 karong sunod Sabado o hangtod sa Pebrero 12 aron di ma-forfeit pabor sa siyudad. (PAC)