TUNGOD sa kabalaka ug kahadlok sa ilang seguridad, mohangyo ang mga sakop sa League of Municipalities of the Philippines Cebu chapter sa Police Regional Office (PRO) 7 nga ibalik ang ilang mga closed-in security.
Kini human banhigi sa armadong mga tawo si San Fernando Mayor Lakambini Reluya ug kaubanan nga gikamatay sa bana niini ug laing duha ka mga kuyog nga sakay sa van sa Barangay Linao, dakbayan sa Talisay niadtong Martes, Enero 22.
Si Consolacion Mayor Teresa Alegado, bise presidente sa LMP Cebu Chapter, nibutyag nga gibati sila og kahadlok sa ilang kaluwasan ning panahona human gi-ambush ang usa sa ilang kaubang mayor sa San Fernando.
Nunot niini, pinaagi sa luwatan nga resolution sa liga, mohangyo sila sa PRO 7 nga hatagan sila og balik og closed-in security.
“Kami sad mismo, dili sad mi assured especially nga tingali there are those nga walay kuan pero daghan man gud especially karon nga kanunay, walay sala i-redown dayon og drugs nga wala pay proof, wala pay evidence,” pahayag sa mayor sa Consolacion nga nahinabi sa Superbalita Cebu human sa tigom sa Provincial Development Council (PDC) sa Kapitolyo, pagka Biyernes, Enero 25.
Si Gobernador Hilario Davide III namahayag nga angay pun-an ang magbantay ni Mayor Reluya.
Ang gobernador, chairman sa Regional Peace and Order Council (RPOC) 7, nisugyot sa kapulisan nga mag-umol og special investigating task force nga maoy moimbestigar sa sunodsunod nga pagpamatay sa mga opisyal sama nila ni Mayor Mariano Blanco III ug Bise Mayor Jonah John Ungab ug uban pa.
“We expect the police to do their job, buhaton lang ilang trabaho. Atong namatngunan mga public officials nani ang mga biktima karon- mayor, kapitan, konsehal. So, dapat gyud, wala pa gani masulbad ang ubang murder cases katong kang Blanco ug Ungab. So, the police should step up,” dugang ni Davide.
Ubos sa Republic Act 7166 kun Synchronized National and Local Elections and Electoral Reforms Act, panahon sa election period nga nagsugod niadtong Enero 13, way kandidato sa piniliay apil ang incumbent nga opisyal nga magpapili, tugotan mokuha sa serbisyo sa security personnel o bodyguards, bisan kon pulis, sundawo o law enforcer sa gobiyerno.
Kini gawas lang kon kini dunay hulga sa kinabuhi, ang Commission on Elections pinaagi sa application, modestino og pulis, sundawo o law enforcer alang sa iyang seguridad sud sa election period.
Ang mga mayor nag-emergency meeting sa social hall sa Kapitolyo human sa tigom sa PDC diin gihisgotan kon unsay lakang nga ilang himuon, usa na niini ang pagpalabang og resolution aron ipaabot ang ilang hangyo ug kabalaka ngadto sa PRO 7. (SCG)