Editoryal: Hain ang gugma?
VALENTINE’S day karon.
Kini gitawag og adlaw sa gugma kay si St. Valentine nga usa ka martyr tungod sa Kristohanong pagtuo nga wa gyud niya gisalikway, maoy patron sa malipayong kaminyuon, magtiayon, managhigugmaay ug gugma.
Apan, subo kaayong huna-hunaon nga ang gugma lain og kahulogan sa uban.
Tan-awa ra gud, daghan ang mang-check-in nga mag-engage sa pre-marital sex.
Naa say uban nga nagbudhi sa kaminyuon kay lain ang gikauban sa pribado ug mabugnaw nga lawak, di ang kapikas, karong adlawa.
Bisan diha sa atong palibot, lisod sab pangitaon ang gugma.
Kadaghan sa mga batang pinasagdan sa karsada nga pipila lang ang nagpakabana sa paghipos ug pag-atiman kanila.
Mismo nangsanay ang rugby boys kay gipasagdan lang sila sa ilang mga ginikanan nga busy sa personal nga mga gimbuhaton.
Wa gyud hatagig higayon o panahon ang mga anak kay nagpasulabi sa ilang bisyo.
Mao nang daghang mga batan-on karon ang mas malipayon sud sa mga gang ug fraternity.
Diha ilang nakit-an ang gugma, pagdawat ug paghangop sa ilang mga kauban.
Wa sila makaamgo nga usa diay ka laang ug kaalautan ang ilang nasudlan. Di diay gugma, kon di kasilag sa isig ka ingon ang gitudlo.
Pait no?
Sa ulohan sa kanta sa Black Eyed Peas kini nangutana kon “Where is the love?”