PORMAL nang giablihan sa Vicente Sotto Memorial Medical Center (VSMMC) ang ilang bag-ong ekstensyon sa pediatric facility ug bag-ong gipalambo nga ward 3B nga alang sa mga pasyente nga adunay kritikal nga kondisyon, Biyernes Enero 25.
Matod ni Dr. Gerardo M. Aquino Jr., medical center chief sa VSMMC nga ila kining gibuhat aron maatiman ang ilang nagkadaghan nga mga pasyente.
Ang pediatric facility usa ka parte sa Pediatric Pavillion nga naa nahimotang sa 3rd floor sa nahisgutang hospital.
Sa pagkakaron, aduna na kini 44 ka buok bag-ong mga higdaanan, 22 niini cribs ug 22 niini regular lang nga mga higdaanan.
Samtang ang Ward 3B mao ang 10 ka mga pribadong kwarto nga gigahin alang sa mga pasyente nga adunay kritikal nga kondisyon sama sa mga nipa ilawom sa heart transplant, kidney transplant, brain surgery ug uban pa.
Matod ni Aquino nga aduna sila’y pagaablihan nga Milk Bank karong Enero 31.
Usa kini ka pasilidad nga punduhanan, mokolekta ug moproseso sa human milk.
“The objective of the milk bank, those who can give extra, didto na ibutang, ug those who need it adto na magkuha,” matod ni Aquino
Iya sab gihangyo ang publiko sa pagsabot kon aduna man gani pagkuwang ang ilang tambalanan.
Nitambong sa kalihokan sila si Presidential Assistant for the Visayas Michael Dino ug Cebu 1st District Representative Raul del Mar.
Gipahalipayan ni del Mar ang VSMMC sa padayong pagpalambo sa ilang pasilidad.
Si del Mar usa sa mga magbabalaud nga nagtabang kanunay aron mapalambo ang mga pasilidad ug serbisyo sa tambalanan.
Iya usab nga giseguro nga makabenepisyo ang mga lumolupyo sa north district. (Kiziah Marie T. Suello, USJ-R Intern )