KAPIN sa P 1.3 million nga balor sa illegal nga drugas ang nasakmit sa Station 10 sa Cebu City Police Office atol sa buy-bust operation sa Barangay Lawaan 1, siyudad sa Talisay alas 12:40 Sabado sa kaadlawon, Enero 26.
Pinangulohan sa ilang hepe nga si Police Chief Inspector Keith Andaya, ang mga pulis nisikop kang Philip Abella, 28, taga Jerusalem Street, Barangay Buhisan, Dakbayan sa Sugbo.
Si Abella giila nga high value target.
Nakuha gikan kang Abella ang usa ka plastic box, nga dunay 21 ka medium packs ug usa ka laing dako nga putos sa gituohang shabu. Ang tanan motimbang og 205 gramos nga dunay Dangerous Drugs Board value nga P1,394,000.
Giimbestigar si Abella diin gikan ang iyang supply sa illegal drugs.
Dunay mga higayon nga ang kapulisan mopahigayon og operasyon gawas sa ilang area of jurisdiction kon kini may kalabutan pa sa ilang unang operasyon.