HUMAN sa mga nadawatang taho kalabot na sa “extra service” nga gitanyag sa pipila ka mga spa dakbayan sa Cagayan de Oro, gi-aghat sa Regulatory and Complaint Board (RCB) ang mga spa nga magpa-awtorisar sa City Tourism o magmugna og grupo sama sa Cagayan de Oro Health and Wellness Association Inc. (Hawai).
Mibutyag si Antonio Resma Jr., secretary sa RCB ug inspectorate team leader, nga tumong gayud sa ilang kampanya nga mismong ang mga spa na ang magbadlong sa mga attendant ug kustomer kung ugaling duna'y susama niini nga mga binuhatan sulod sa maong patigayon.
“Atong tumong sa kaning mga spa is self regulation nga sila na mismo mobadlong sa ilang attendant kay diha man gyud na magsugod kung wala'y mo offer nga attendant wala sad gyud ingon ana kung naa man gale customer magpabadlong mangayo ana pwedi man nila na isumbong sa kapulisan,” matud ni Resma.
Gi-aghat usab niini ang mga patigayon ilabi na ang spa nga magpa-accredit sa City Tourism ilabi na usab niining grupo nga gimugna nga Cagayan de Oro Hawai diin maayo ang katuyoan niining maong grupo.
“Cagayan de Oro Hawai kani ang grupo sa mga spa nga nagpa accredit sa tourism office, naa na silay grupo, ang atong approach kay bag-o pa sila nga grupo kung naay angay nga e-replicate atong e encourage ang uban nga spa owners nga mouban sila ato nga ang katuyoan sa Cagayan de Oro Hawai,” dugang ni Resma.
Nasayran nga usa sa mga tumong niining grupo nga mapugngan o mawala na ang maong gitawag nga “extra service” sa mga spa sa dakbayan.
Kahinumdoman nga usa ka kauban sa media ang mismong nakasinati niining maong “extra service” human kini gitanyagan sa masahista samtang nagpamasahe.