DUGAY na kaayo nga isyu sa ang bike lanes sa nagkadaiyang mga dapit sa nasod. Dinhi sa Dakbayan sa Sugbo, kami sa biking sector nangunay mismo sa pagduso niini sa Cebu City Council pipila ka mga tuig ang nakalabay. Panahon kadto ni kanhi mayor Michael Rama. Napulihan na lang siya ni Mayor Tomas Osmeña ug hapit na lang mapupos ang unang termino sa mayor, wa gihapoy nahitabo.
Karon ang Department of Public Works and Highways (DPHW) ubos ni Secretary Mark Villar misaad nga magbutang na sila og bike lanes sa mga highway. Kaanindot kon madayon. Apan mas malipay ko kon ilang unahon pagbutang og mga sidewalk sa mga karsada kay mas importante ni alang sa safety sa kinabag-an sa publiko.
Mag-unsa ang bike lanes kon ang kadaghanan sa katawhan mapugos usab paglakaw sa karsada kay way sidewalk nga ilang masubayan. Alang nako, mas importante ang sidewalk kay sa bike lanes. Mas daghan ang makabenepisyo sa pedestrian lanes.
Didto gani sa Guangzhou City, China, tungod sa kalapad sa ilang sidewalk, naa usab ang mga biseklita ug e-bikes magsubay subay. Dinhi sa atoa, ang lapad nga sidewalk kana ra gyung sa Osmeña blvd., gikan sa area sa Plaza Independencia ngadto sa Kapitolyo. Sa Colon usab unta, apan daghan usab og sidewalk vendors nga nanginabuhi.
Bike lanes
Gitun-an sa nagkadaiyang grupo sa bikers ang pagbutang og bike lanes dinhi sa Cebu City. Di tanang mga karsada sa Dakbayan ang mabutangan. Among gi-propose ang dagkong mga dan. Unya di pa exclusive, kanang shared pa gyud. Apan ang priority ang bikes. Pananglitan, ang mga sakyanan makasulod lang sa lane kon way nagbiseklita ug mohatag og agianan sa nagbiseklita.
Apan daghan ang nabalaka nga momugna kini og trapiko dinhi. Sa tinud-anay lang, sa akong naobserbahan sa pipila ka mga nasod nga akong naduaw, wa kini makamugna og trapiko. Nalikayan usab nga mabutang sa kakuyaw ang kinabuhi sa mga siklesta.
Mas epektibo ang bike lanes kon dunay mas transport system nga maayo. Kon duna na kitay maayong transport system, kaanindot na ibesiklita kay gamay na lang mga sakyanan sa karsada.
Mag-bike
Mas maanindot ang lugar kon kinabag-an sa mga tawo magbiseklita. Seguradong mo-improve ang panglawas sa katawhan kay gawas nga naka-exercise, mominos na ang pollution kay minos na usab ang aso nga gibuga sa mga sakyanan.
Tan-awa ra gud, sa biseklita, diha-diha dayon imong makita ang benepisyo sa lugar nga ang katawhan manikad. Makaguol lang kay ang kagamhanan kuwang kaayo og suporta. Kuwang man gud sa panglantaw sa unahan.