Diola:Libro

Fr. Carmelo Diola

KANIADTO linukot ang libro. Hinimo kini gikan sa usa ka balili nga nagtubo sa kiliran sa sapa ug uban pang tubigon nga lugar. Naa say mga libro nga gikan sa panit sa mga mananap. Ang linukot nga libro ibukhad sa tuo nga kamot ug pagalukoton sa wala. Baga kini, bug-at, ug lisod dad-on ug gamiton. Ang paghimo og libro magsugod sa pagpili og hisgotanan. Pagasundan kini sa pagsusi sa mga tinubdan kun “sources”.

Gihisgotan ni Lucas Ebanghelista ang iyang mga tinubdan: “Sanglit daghan na man ang mga naningkamot sa paghatag og taho sa mga butang nga natuman na taliwala kanato, sama nga kini gitugyan kanamo sa mga tawo nga gikan pa sa sinugdanan nahimo nga mga saksi ug mga alagad sa Pulong.” Mga saksi si Jesus maoy tinubdan ni Lucas. Nakaako ang ebanghelista sa paghimo og libro: “Sa akong tan-aw, maayo usab alang kanako, human sa tukma nga pagsubay niining tanan sukad pa sa sinugdanan, nga mosulat ako kanimo sa han-ay nga paagi, O labing halangdon nga Teofilo, aron masayod ikaw bahin sa mga butang nga kasaligan na maoy gitudlo kanimo.”

Paghatag diay og katin-awan (“pagsubay niining tanan sukad pa sa sinugdanan”) alang sa mga tumutuo ang tumong sa ebanghelyo ni Lucas. Paglig-on kini sa pagtuo. Usa ka maampuon ug mahigugmaong buhat ang pagsulat sa maong ebanghelyo.

Sa dihang gibasa ang balaod ni Moises atubangan sa mga Israelita, nanghilak kini sila, sumala sa libro ni propeta Nehemias. Nagkauban ang gobernardor nga si Nehemias ug si Esdras nga pari sa dihang gibasa kini. Naghatag og panaghiusa ang basahon. Dili lang diay pinatik nga letra ang libro kondili Diosnong presensya ug gahom.

Kining panaghiusa nga gipahigayon pinaagi sa pulong sa Dios sa pagbasa ni Esdras gipalagman diha sa sulat sa mga taga-Corinto. Gitando ni Pablo ang tumutuo sa usa ka lawas: “Kay ang lawas dili usa ra ka bahin kondili daghang mga bahin...Ang Dios nagpahimutang sa nagkalainlaing bahin sa lawas sumala sa iyang pagbuot.” Bahin ang matag usa ka magtutuo sa lawas ni Cristo ug lainlain ang atong mga papel. Kabahin sa Kristohanong dignidad walay labaw kondili patas.

Ang ikaduhang bahin sa ebanghelyo gihisgotan ang pagsugod sa publikanhong pagpangalagad ni Jesus human siya tentala sa yawa didto sa lugar nga awaaw. Gibukhad niya ang linukot nga libro ngadto sa sinulat ni propeta Isaias nga nagkanayon: “Ang Espiritu sa Ginoo ania kanako tungod kay gidihogan niya ako aron pagsangyaw sa maayong balita nga sa mga kabos.”

Alang kanato ang mensahe sa maong libro. Gamhanan kini nga mga pulong. Makahinlo kini kanato ug makadasig. Makadani ug makakabig ngadto kang Jesus. Salamat sa Dios nga aduna kitay bibliya nga ang kahulogan masabot kon nagpuyo kita isip Simbahan.

Kanunay ba kitang mobasa sa Bibliya?

Binasi sa Nehemias 8:2-10; Salmo 19;1 Taga-Corinto 12:12-30; Lucas 1:1-4; 4:14-21

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph