MALIPAY gayud ako sa pagbasa sa saad sa Diyos nga ang Iyang mga nangamatay nga mga katawhan mabanhaw pag-abot Niya. Kaanindot pamalandungon nga ang mga namatay diha Kaniya adunay saad nga mangabuhi pagbalik pag-abot anang taknaa.
Si Ginoong Jesus mismo nagsulti nga adunay duha ka mga pagkabanhaw nga mahitabo sa ulahing panahon. “Ayaw kahibulong niini; kay ang takna moabot nga ang tanan nga anaa sa mga lubnganan makadungog sa Iyang tingog ug mangabanhaw- sila nga mga naghimo og matarong, ngadto sa pagkabanhaw sa kinabuhi, ug sila nga naghimo og dautan, sa pagkabanhaw ngadto sa kamatayon” (Juan 5: 28, 29).
Kining teksto nagasulti kanato nga ang tanang nangamatay mangabanhaw. Apan si Pablo nagsulat kanato nga dili dungan ang pagbanhaw sa mga matarong ug sa mga dautan. Matud pa niya sa unang Tesalonica 4: 16, “Kay ang Ginoo mismo magakanaug gikan sa langit uban sa pagsinggit, inubanan sa tingog sa arkangel, ug sa trumpeta sa Diyos. Ug ang mga namatay diha kang Kristo mabanhaw og una.”
Klaro kaayo ang pagkasulti ni Pablo nga unang mangabanhaw ang mga patay'ng matarong. Ug kini mahitabo sa pagbalik ni Jesu-Kristo. Ang bersikulo 17 nagasulti kung unsay mahitabo sa mga matarong nga nabanhaw paghuman niining mahimayaong okasyon- “Ug kita nga mga buhi pagasapnayon kauban nila (mga nangabanhaw nga mga matarong) ngadto sa mga panganod sa pagtagbo sa atong Ginoo sa kahanginan. Ug mag-uban kita sa atong Ginoo sa tanang panahon.”
Paghuman sa pagkabanhaw sa mga matarong, kuyog sila sa mga matarong nga wala nangamatay, pagadad-on kitang tanan sa langit matud pa sa Pinadayag 20: 4- “Ug nakita ko ang mga trono, ug sila nangalingkod didto, ug ang paghukom gipahat ngadto kanila...” didto pagadad-on sa Diyos ang tanang matarong sa mga trono sa gingharian sa Diyos sa langit human sa ilang pagkabanhaw.
Mao sab kini ang saad ni Ginoong Jesus sa Juan 14: 1- 3. Siya nagasaad nga magabalik dinhi sa atong kalibutan, ug magadawat kanato Kaniya, ug magadala kanato kung aha kita Niya dad-on.
Kaanindot huna-hunaon nga bisan pa ang kamatayon walay gahum nganhi kanatong nagapabilin sa pagkamatarong. Ug nagahatag kini kanato og paglaum nga bisan pa kita mamatay, basta anaa kita sa kamatuoran, nagapabilin kita kang Kristo, dili gayud kita mahadlok, kay ang pagkabanhaw alang kanato, segurado.
Akong nahinumdoman ang istorya sa pagkabanhaw ni Lazarus (Juan 11: 43, 44). Dakung kurat ang na-eksperiensiya sa mga Judeo pagkakita nila nga si Lazarus, nga namatay upat na ka adlaw, nga sila mismo ang naglubong, migawas gikan sa lubnganan ug nabuhi pag-usab! Kasagaran kanila wala nagatoo nga adunay pagkabanhaw, apan nakita sa ilang mga mata ang nabanhaw'ng Lazarus! Sukad kaniadto, natarog ang sayop nga pagtuluohan sa mga dili-nagatoo-sa-pagkabanhaw nga mga Judeo.
Tinuod ang pagkabanhaw, higala. Padayon sa pagtoo nimo kang Kristo Jesus, aron sa Iyang pagbalik, mabanhaw ka tungod kay ikaw nagapadayon nga matarong diha Kaniya.