DIGOS CITY -- Way nakuhang druga ang kapulisan sa gilusad nga surprisang “Oplan Greyhounds” sulod sa Bureau of Jail Management and Penology (BJMP) niadtong Huwebes, Enero 24.
Gikompirma ni Senior Superintendent Alan Manibog, police provincial director, adlaw’ng Sabado, Enero 26, nga limpyo sa ilegal nga druga ang BJMP.
Apan nakuha sa kapulisan ang pipila ka mga mahait nga butang ug ubang matang sa hinagiban nga anaa sa posisyon sa ubang piniriso.
Nakumpiska sa kapulisan ang mga lapis, ballpen, nail cutter, samin, toothbrush, tahal, gitalinis nga kutsara, gunting, lighter, mabuak nga plato ug mga botelya.
Apil sab nga gikumpiska ang mga pisi ug liston sa sapatos nga mahimong magamit sa paghikog ugaling mosangko sa depresyon ang usa ka piniriso.
Mas gipahugtan pa sa mga personahe sa BJMP ang pagbantay aron masegurong di makapuga ang mga piniriso.
Gitataw ni Manibog nga kanunay nang pagahimuon ang Oplan Greyhound aron di makalusot ang ilegal nga druga sa bilanggoan.
Moagi sab sa makuting inspeksiyon ang mga kabanay o higala nga mobisita sa usa ka binilanggo. (Orlando B. Dinoy)