NIBALIK na sa ilang operasyon ang Pollution Abatement System Specialist Inc. (PASSI) human ilang nakuha ang permit alang sa treatment-storage and disposal (TSD) sa central office sa Department of Environment and Natural Resources (DENR).
Si Antonio Camelo Tompar, CEO ug chairman of the board sa PASSI, nipahibawo niini.
Iyang gipasalamatan si DENR Secretary Roy Cimatu, Undersecretary Rodolfo Garcia, ug Director Metodio Turbella gumikan sa paglusot sa ilang gipangayo nga dokumento.
“Duterte effect, I have seen that. I have witnessed that and I have good news for Cebu. Now that we have this (TSD), we can now welcome everybody. Come to us, call us and have your medical wastes treated buy us,” awhag ni Tompar sa hospitals.
Iyang gipahibawo nga ang PASSI adunay transport to permit ug makahakot sila og labing daghan 4,000 ka kilo nga medical wastes matag adlaw.
Ang PASSI wala maka-operate sa nakalabay nga unom ka buwan gumikan kay wala silay TSD.
Ang ilang kahimanan sa TSD maka-proseso og 2,000 ka kilong medical waste matag oras sanglit sobra ka dako ang ilang autoclave nga mowagtang sa tanang kagaw sa basura gikan sa tambalanan.
Si Jaz See, general manager sa PASSI, niingon nga sa 4 cubic meter nga gitugot sa DENR nga ilang mahakot, 50 porsiyento pa ang ilang naabot sanglit dihang wa pa mahunong ang ilang operasyon niadtong Hunyo sa niaging tuig, makahakot lang sila og duha ka tonelada.
MIHAKOT SA VSMMC
Matod ni Atty. Paul Gino Lopez, chief administrative officer sa Vicente Sotto Memorial Medical Center (VSMMC) nga gikolekta na sa PASSI ang ilang mga medical wastes niadtong Enero 24, Huwebes.
“3,076 kilograms plus another collection of 2,862 kilos. Mao nay collection. Katong 3,000 kapin gabii, pag January 24 while ang katong 2,862, karong buntag, January 25,” subay Lopez.
Ang PASSI control officer nga si Irene Doñoso nikompirmar nga nagsugod na silag kolekta og medical wastes sa Vicente Sotto Memorial Center (VSMMC) sugod adtong Enero 24 sa gabii.
“The moment nga na-approve ang permit, good as day 1 of operations na,” sigon ni Doñoso.
Apan iyang giklaro nga wa pa sila nagsugod og pangolekta sa laing mga kliyenteng hospital sa siyudad sa Sugbo, ug ang VSMMC pa ang ilang unang nakolektahan sa mga medical wastes.