NANGAHADLOK na ang mga barangay opisyal sa lungsod sa San Fernando, lalawigan sa Sugbo, human sa sunodsunod nga gipamatay nga mga barangay kapitan sa lungsod.
Pipila ka adlaw ang milabay, gi-ambush ang van nga gisakyan ni Mayor Lakambini “Neneth” Reluya nga niresulta sa kamatayon sa iyang bana nga si Panadtaran barangay kapitan Ricardo “Nonoy” Reluya.
Siya ang presidente sa Association of Barangay Councils (ABC).
Niadtong miaging semana, si Magsico barangay captain Johnny Arriesgado gipatay usab sa armadong mga lalake.
Si Arriesgado mao ang bise presidente sa ABC.
Atol sa dayalogo tali sa mga opisyal sa Police Regional Office 7 ug mga barangay opisyal sa lungsod, nga gitambungan usab ni 1st District Congressman Samsam Gullas, ilang gipasupot ang ilang kabalaka sa ilang lugar.
Usa sa ilang gikahadlokan ang pagpangabot sa bag-ong mga salta sa ilang mga barangay nga wa sila makaila.
Giingong magsuroysuroy kini nga kadudahan ang linihukan sa wa pa nahitabo ang pagbanhig sa sakyanan ni Mayor Reluya.
Si Filomeno Leyson, purok federation president sa San Fernando, nagkanayon nga aduna silay nabasahan sa social media labot sa mga patyonon sa ilang lungsod nga nahimong tinuod.
Tungod niini, nangahadlok ang tanang mga barangay official kon kinsa na usab ang isunod.
“Nalibog man gud mi kay kon mo post, murag makaingon ko nga tinuod. Kay kon moingon nga mao ni mamatay, mahitabo. Sunod naay patyon, nahitabo gyud kanang nang gawas sa social media, gi post nga mao ni ang mahitabo,” matod ni Leyson.
Gisalikway usab niya ang pagduda nga adunay kalambigitan sa illegal nga drugas ang hinungdan sa ilang kamatayon ilabi na sa habig sa mga Reluya.
Lakip sa nabalaka si Kongresista Gullas sa kahimtang sa lungsod sa San Fernando.
Apan misalig kini sa kapulisan nga mihimo sa imbestigasyon nga sa umaabot nga panahon masulbad ra ang nahitabong sunod-sunod nga patay sa lungsod.
“Of course, yes nabalaka. Its very difficult to tell them. There is nothing you can say right now to make them feel better, honestly Mayor Reluya is in pain both physically and the pain of losing a husband,” matod ni Gullas.
PROTEKSYUNAN
Hinuon gisaad ni PRO 7 Director Chief Supt. Debold Sinas nga ilang hatagan og proteksyon ang mga molupyo lakip na ang mga barangay opisyal sa maong lungsod.
Gani, nimando dayon siya sa hepe sa Cebu Provincial Police Office nga pabutangan og daghang pulis ang maong lugar aron molusad og check point.
“Sa karon, ang ilang concern naay ilang pagduda nga naay bag-ong nawong nga miadto sa ilang lugar. Naay nanghadlok ug manghulga sa ilaha related sa election. So, among pakusgon ang amoang checkpoint ug magbuhat pag usa ka mobile checkpoint ug team nga magpatrolya,” matod ni Sinas.
Awhag niya sa mga taga San Fernando nga di motuo sa mga gipang-post sa social media nga iyang gihulagway nga fake news.
Tinguha usab ni Sinas nga mohangyo kang PNP Director General Oscar Albayalde nga lugwayan pa ang iyang ultimatum nga duha ka semana.
Iyang gipasabot sa ilang labaw nga padayon pa ang Special Investigation Task Group sa ilang imbestigasyon ug natagbaw ra siya niini.
Gilakayan nila nga magpataka og dakop bisan way kalabutan sa krimen.
“Lisod ma-pressure. Basin magkamali mi. Amo gyud pugson para lang makuha ang deadline? I already initially informed the chief PNP that the investigation is ongoing,” dugang ni Sinas.
Nakakuha nag mga ebedensya ang SITG Reluya nga di lang una ipahibawo ni Sinas kon unsa kini aron di mabalda ang ilang imbestigasyon.
Gipasalig usab sa PRO-7 nga hatagan nilag siguridad ang haya hangtod na nga malubong kadtong nangamatay sa pag banhig. (dugang taho ni SCG)