ANS naa na'y alumni basketball tourney

ADUNA na’y basketball tournament alang sa ilang alumni ang labing dakong pampublikong tunghaan sa Sugbo nga mao ang Abellana National School.

Gipanganlan og Abellana National School Alumni Basketball Leaguee (ANSABL) Season 1, ang torneyo opisyal nga mosugod karong Pebrero 3 sa Cebu City Sports Institute.

Nagsugod lang ang tanan niadtong 2017 diin nagkasabot ang alumni sa ANS nga mahiligon og basketball nga magtapok aron magduwa.

Sa pagkatukod sa ANSABL, miabot sa 17 ka teams gikan sa nagkadaiyang batches ang naporma aron magkombati sa Season 1.

“Dili ni one-time league. Nagplano mi nga himuon ni kada tuig ug nanghinaot mi nga makahibalo ang ubang alumni ani nga tournament,” matod ni commissioner Ariel Arcilla Estarte sa press conference niadtong Sabado sa gabii sa ANS alumni office.

Si assistant commissioner Vincent Hughie, kinsa nakadumala na og statistics sa nagdaiyang mga basketball tournament sa Sugbo, nga gawas sa camaraderie, naglantaw sila sa laing mga plano sa pagpahigayon ning maong torneyo.

Asoy ni Hughie nga pinaagi ning maong torneyo, makatabang ang alumni sa student-athletes sa tunghaan sa ugma damlag.

Ang partisipanteng teams mosubay sa single-round robin format diin ang mopatigbabaw nga upat human niini mao ang makasulod sa semi-finals.

Adunay mokampiyon alang sa 1990s ug 2000s divisions.

Mopahigayon sab og All-Star Game ang liga unya aduna kini MVP ug Mythical Five. (RSC)