SECTIONS
Friday, September 20, 2019
SUPERBALITA CEBU

Editoryal: Linuog, sinalbahis

Editorial cartoon by Ariel O. Itumay

DILI tiaw, makapakurog sa atong kaunoran sa tumang kaluoy sa mga biktima uban sa kalagot sa nagpaluyo sa linuog ug sinalbahis nga pagpabuto sa duha ka mga bomba sa sulod sa Simbahang Romano Katoliko sa lungsod sa Jolo, Sulu atol sa nagpadayon ang misa kagahapon sa buntag, Enero 27, diin dili mominos 27 ka mga tawo ang namatay ug 77 ang angol nga naglakip sa awtoridad.

Walay pagtahod nga bisan ang balaang dapit nga puno sa nanimba wala pasayloa? Mga enosente sibilyan ang nakalas. Unsa kasalbahis ug linuog nga pamatasan bisan pa kon unsay motibo nga nagpaluyo sa ilang linuog nga buhat. Manghinaut kita nga masikop sa labing daling panahon ang malapason sa balaod ug mahatagan og hustisya ang mga biktima.

Si Autonomous Region in Muslim Mindanao (ARMM) Governor Mujiv Hataman nikondenar sa hitabo. Gidasunan usab kini sa Malacañang.

Nagduda si Hataman nga ang pag-ataki aron pagtigaw sa nag-ung-ong nga laing sabotsabot sa kalinaw ug ang pagkapasar sa bag-ong Bangsamoro Autonomous Region in Muslim Mindanao nga mohulip sa ARMM, ug kini ang pagpatuman sa unod sa 2014 peace deal tali sa kagamhanan ug laing dako nga Moro rebel group, ang Moro Islamic Liberation Front (MILF).

Ang mayoriya sa katawhan sa Muslim Mindanao ningboto pabor sa halapad nga dapit nga masakop sa autonomy. Apan bugtong ang daknbayan sa Isabela sa Basilan ug lalawigan sa Sulu , diin nahitabo ang duha ka mga pagpabuto sa bomba ang supak sa Bangsamoro Organic Law.

Layo kita sa Jolo apan takos ang atong pagpakabana ug pag-ampo nga dilli kini moawas ang kasamok sa atong dapit. Manawagan kita nga magpadayon ang tinguha sa malahutayong kalinaw sa Mindanao taliwala sa mga pangtahibo nga linuog ug sinalbahis sa huta sa mga saad, lakip sa paghatag og hustisya alang sa mga biktima.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph