USA ka 26 anyos nga lalaki nga nagdula lang og 'taksi' sa gawas sa ilang panimay uban ang mga menor de edad ang gipusil patay sa lalaki nga naka-motorsiklo.
Patay diha dayon ang biktima nga giila nga si Jaime Perez, residente sa Upper Tabok, dakbayan sa Mandaue.
Matud ni Police Chief Insp. Ramel Morpoz nga hepe sa Basak Police Station nga nadawat nila ang alarma sa pagpamusil alas 2:50 Lunes sa hapon, Enero 28.
Giingon nga nagdula ang biktima uban ang mga menor de edad, 10 metros gikan sa ilang panimay, sa dihang duha ka mga lalaki nga nag-motorsiklo nga walay plate number, nagsuot og bonnet ug helmet, ang kalit nga nihunong sa ilang tungod.
Ang back rider ang way duha-duha nga nipusil sa biktima makadaghan nga higayon nga niigo sa abaga, ug sa naw'ng niini. Hinungdan sa iyang hinanaling kamatayon.
Sa inisyal nga pakisusi sa kapulisan, gihulagway sa mga paryente ang biktima nga buotan.
Apan matud ni Morpos nga gibutyag usab sa mga silingan niini nga nalambigit kini sa ginadili nga drugas.
"Duha ka motives ato gitan-aw ani nga anggulo. We are looking into the possibilities nga naa ni siya na-kontra or kana may labot sa illegal drugs, ato pa na gi-dig up ang giingon nga nalambigit siya sa illegal drug trade," gitug-an ni morpos sa Superbalita Cebu.
Dugang ni Morpos nga susihon nila sa ilang police station record o sa Mandaue City Police Office level ug sa barangay kon anaa ba kini sa drug watchlist.