BISAN wa nakadaug sa miaging Quarter 2 semi-finals sa “Tawag ng Tanghalan” sa It’s Showtime ang Cebuana singer nga si Girlie Lapinid-Laspinas pero dakong garbo ang gihatag niya sa Sugbo.
Kay kon wa ko masayup, mao tong unang higayon niadtong Sabado nga dunay nikantang live sa classic Cebuano song nga “Langit ug Yuta” sa usa ka national television show.
Daghan tang nindot nga mga classic Cebuano pero ang nahibaw-an sa Manila kay maorag “Matud Nila” ug “Usahay” ra gyud. Wa man gu’y mangisog nga mokanta sa uban natong mga kanta.
Tan-awa di puwerteng dayeg sa mga host ug judges sa It’s Showtime sa “Langit ug Yuta.”
Unta kining bag-ong henerasyon sa mga singing champion sa Cebu nga naka-penetrate na sa Manila, sama nilang Jenine Berdin, Sheena Belarmino, Golden Canedo ug Morissette Amon, ila unta ning kantahon sa ilang mga show.
Magpasalamat ko ni Ms. Anna Marie Fegi-Brown nga nagpakita og interes nga i-revive ang kantang “Unsay Bili?” nga iyang nadag-an sa Cebu Pop Music Festival niadtong 1997 kay iya kunong ipa-arrange sa laing garbo usab sa Sugbo nga si Elvis Somosot.
ULTIMATE RESBAK
Sa tinuod duna pa gihapoy dakong chance nga makabalik si Girlie Laspinas sa Tawag ng Tanghalan (TNT).
Kay duna pa may Ultimate Resbak o wildcard diin magtigi og balik ang mga semi-finalist nga wala nakadaug sa quarter finals.
Dinhi mokuha ang TNT og duha pa gikan sa wild card aron maoy mokumpleto sa Top 10 sa grand finals.
Pareho ni Ato Arman sa TNT Season 2 nga wa sad kadaug sa semi-finals pero dire siya nada sa wildcard ug siya pa gyuy nahimong runner-up ni Jenine Berdin sa grand finals.
So, it’s not over yet for Ms. Girlie! Laban lang!
NAGPABUGNAW?
Naa diay ron sa Manila ang ex-Pinoy Big Brother housemate ug Fil-Italian model-actor Marco Gallo.
Nanamilit na ni siya sa showbiz sa miaging tuig ug nibalik na sa Italya. Nagpabugnaw ra diay kaha to siya?
Kay gidungog man gud nga nauyab niya si Juliana Gomez, ang unica hija sa magtiayong Richard Gomez ug Lucy Torres.
Gi-deny na hinuon ni Ormoc City Mayor Richard Gomez nga siya ang rason nganong nibiya si Gallo sa Philippine showbiz.
Suwerte ang mga taga-Balamban kay mobisita diha sa Gaisano Balamban si Marco Gallo sa Pebrero 16 alang sa ikaduhang bola sa A Million Thanks raffle promo sa Gaisano Main, Country Mall ug ubang sangang tindahan.