ALAS tres sa hapon, Disyembre 14. Miungot ang trapik sa dalang lugsungon sa Jagobiao padulong sa Consolacion. Tagdugay na molihok ang mga sakyanan kay bumper-to-bumper ang trapik. Kusog pa ang panaw sa mga nanaglakaw.
Nagpunsisok luyo sa multicab nga pick-up sila si Ruben, Dennis, Denver, Ponso ug Hector. Gibati na nila ang kainit ug kalaay. Mga estudyante sila sa kolehiyo nga gihangyo sa ilang Tiyo Anton nga mamanday sa beach resort niini nga tua sa lungsod sa Carmen. Siya ang nag-drayb sa multicab.
Nasikit dapit sa tuo sa multicab ang usa ka dyip pasaheroan nga biyaheg Danao-Cebu. Gilaay na ang drayber niini, ang mga pasahero ug ang konduktor. Agwanta lang sila. Nagkapyot sa estribo luyo sa dyip ang konduktor nga nagsigeg tan-aw nilang Ruben ug mga kauban. Aron mawala ang kalaay nakahunahuna ang konduktor sa pakighinabi kang Ruben.
“Bay, magsuon mong lima?” matod sa konduktor nga mitutok kang Ruben.
“Nanong nakapangutana man ka?” ni Ruben sa mahigalaong tingog.
“Pareha gyud mog mga nawong, kamong lima!” sa konduktor.
“Dili tanan. Tulo ming magsuon,” ni Ruben nga mihikap sa ulo nilang Dennis ug Denver. Silas Ponso ug Hector magsuon pod, among mga ig-agaw.”
“Lutaw gyud kaayo inyong kaliwat,” sa konduktor.
“Among amahan maguwang sa amahan nilang Ponso ug Hector,” ni Ruben nga maoy tabian sa lima. Ang upat igo lang mokidhat-kidhat ug unya mopahiyom panagsa.
“Di gyud ikaglimod nga kadugo gyud mo,” sa konduktor.
“Sa imong tan-aw pareha mig nawong lima? Mga guwapo!” ni Ruben nga nagpahiyom. Mibudlot ang mga simod sa upat niya ka kauban.
“Di lang ko kasulti. Kay kon moingon ko guwapo, molapad inyong atay. Kon moingon ko di guwapo, masuko unya mo nako. Busa kamo ray makahukom. May samin god mo sa inyo,” sa konduktor nga nagngisi.
“Marunong gyud ka, Bay, da!” ni Ruben nga miingisi pod.
“Gusto mo maghisgot tag mga lamas sa kinabuhi?” sa konduktor nga nagpasiklap sa babayeng mabdos nga daw kaanakon na.
Milabang ang babayeng mabdos sa karsada duol nilang Ruben. May kuyog kining lalake nga nag-agbay niya. Tungod sa kahugot sa trapik, sayon da ang paglabang sa mga tawo. Ang babayeng mabdos ug ang lalake nga iyang kuyog gikan sa dapit habig sa Eversly Child Sanitarium ug nag paingon sa estasyunan sa ABS-CBN.
“Unsa man nang lamas sa kinabuhi? Unsa may kalainan ana sa lamas sa sud-an?” ni Ruben.
“Mao-mao ra. Dunay aslom, halang, pait, tam-is, parat ug uban pa. May panghitabo sa atong kinabuhi nga makalipay, makapalagot, makapaguol o makapakatawa nato,” matod sa konduktor.
“Sama pananglitan sa... unsa man?” ni Ruben.
“Sama sa babayeng mabdos. Unsay ipangutana nimo niya aron mahikatawa siya? Ug unsay ipangutana nimo niya aron masuko siya?” sa konduktor. Daghang pasahero sa dyip nga naminaw niya.
“Mora man nag dramang putol sa MOR!” ni Ruben.
“Idol nako si Idol Turagsoy. Gusto sab kong makapakatawa ilabi na sa panahon sa trapik!”
“Mora mag tanghaga imong pangutana. Ikaw na lay hubad sa imong tanghaga,” ni Ruben.
“Pangutan-on nimo ang babaye, ‘Day, seguro di na gyud ka mo-insister nga virgin ka pa?” sa konduktor. Nahikatawa si Ruben ug ang tanang sakay sa multicab Hasta ang mga pasahero sa dyip.
“Unsa man ang makapasuko nga pangutana?” ni Ruben.
Mitan-aw ang konduktor kang Ruben dungan ang pag-ingon, “Day, pila man gyud ka higayon nga naghilawas mo imong bana una ka niburos?’ Nanghugyaw og pangatawa ang tanang nakadungog. Nangauyog ang mga sakyanan. Ang trayenta minutos mikilab lang. Apan nag-ungot gihapon sila. (KATAPUSAN)