NAGDUMILI sa pagkooperar ang uyab ni Ashley Abad sa imbestigasyon sa kapulisan aron maila kon kinsa ang responsabli sa pagkamatay sa 19-anyos nga dalaga atol sa usa ka Sinulog concert niadtong Enero 19 sa usa ka open space sa dakbayan sa Sugbo.
Kini maoy gipamahayag ni Chief Superintender Debold Sinas, ang director sa Police Regional Office sa Central Visayas (PRO-7), kinsa mao karon ang nangulo sa imbestigasyon.
Si Abad giingong gipatomar og party drug niadtong higayona ug migintang la’g pipila ka gutlo ang nakalabay, naglisod kini kini pagginhawa ug dayon nakuyapan. Daling gidala gilayon kini sa tambalanan apan midangat og pipila ka oras nahunosan ra gihapon kini sa kinabuhi.
Sa gipahigayon nga autopsy, nasuta nga ang pagka-overdose sa drugs maoy hinungdan sa iyang kamatayon ug kini nga kasayoran nakapakurat sa iyang mga ginikanan.
Aron kagiyahan sa ilang imbestigasyon, tinguha ni Sinas nga masukitsukit ang uyab niini kinsa kuyog ni Abad atol sa maong hitabo uban sa mga barkada, aron patug-anon kon kinsa ang nagpatumar og drugs kaniya
.
Pero unsa bang pagka-unsaa nga imbis gilauman nga moayuda dayon aron mahatagan og hustisya ang iyang uyab, daw og sa nag-uknol-uknol man ang lalaki.
Matod pa nga dili siya mopagawas og pamahayag kon walay order sa korte.
Iya man tuod kining katungod, apan di usab nato masalikway ang pagtumaw sa mga pagduda.
Buot ba ipasabot nga aduna siyay gitagoan nga alang kaniya mas labaw pa kay sa pagpalutaw sa hustisya sa babaye nga iyang gihigugma?
Unsa may kalahian kon mohatag dayon siya sa iyang pamahayag, motug-an ug mobutyag sa tinud-anay nga hitabo nga dili na magpaabot order pa sa korte?