KAPITOLYO niawhag sa United Kingdom (UK) ug sa ubang nasud nga mag-verify una sa dili pa ilakip ang Sugbo sa ilang mga travel advisory, ilabi na kon ang mga dautang insidente tua ra sa Mindanao nahitabo ug dili dinhi sa Sugbo.
Bisan sa mga pagpamatay nga nahitabo sa Sugbo, subling gipaniguro sa provincial government nga luwas ang tibuok probinsiya.
Bukas si Gob. Hilario Davide III nga i-extend sa Kabisay-an ang martial law.
Dako ang pagtuo ni Davide nga may kalabutan sa bag-o lang nahuman nga plebisito alang sa Bangsamoro Organic Law ang pagpamomba sa cathedral ngadto sa Jolo, Sulu.
Bisan og layo ra ang Sulu dinhi sa Sugbo, giawhag niya ang mga Sugbuanon nga dili mokompiyansa ug kanunay gyud nga magmabinantayon.
Nanglibog si Davide nganong gilakip sab sa UK ang southern Cebu, partikular ang Badian ug Dalaguete sa travel advisory human sa hitabo.
Apan si Joselito “Boboi” Costas, pangulo sa Provincial Tourism Office, nagtuo nga tungod sa kadaghan sa tourist destinations sa habagatang Sugbo ang usa sa mga rason kon nganong kanunay maapil sa luwatan nga travel advisories gikan sa ubang mga nasod ang mga lungsod sa maong bahin sa lalawigan.
Sa uwahing travel advisory sa Foreign and Commonwealth Office (FCO) sa United Kingdom, nipasidaan kini sa ilang katawhan nga likayan ang pagbiyahe sa kasadpan ug central Mindanao ug Sulu archipelago gumikan sa hulga sa terorista human duha ka bomba ang niulbo sa Cathedral sa Our Lady of Mount Carmel sa Jolo, Sulu pagka Dominggo sa buntag, Enero 27.
Dugang sa maong advisory, gipahimangnoan usab ang katawhan sa UK nga nibisita sa ubang bahin sa Mindanao ug naa sa habagatang Sugbo apil ang mga lungsod sa Dalaguete ug Badian nga maglikay gumikan sa hulga sa terorismo.
Sa Dalaguete, mahimong agion ang nabantog nga Osmeña Peak, strawberry farm, Lugsangan Peak ug uban pa samtang sa Badian naa ang Kawasan Falls. Kini nga mga destinasyon kanunay dagsaan sa langyaw nga mga turista.
Matod ni Davide, bisan og dunay mga krimen nga nahitabo sa Sugbo, luwas kini alang sa tanan ug angayang mag-verify ang mga tinugyanan ug uban pang nasud kung ugaling ilang i-apil ang Cebu sa ilang advisory.
Sumala ni Costas wa maapektuhi ang turismo sa southern Cebu sa naunang travel advisory nga giluwatan sa kagamhanan sa UK sa sayong semana sa Enero human sa pagpamomba sa usa ka mall sa siyudad sa Cotabato diin duha ka tawo ang namatay ug 34 ang naangol.
Gani, malampuson ug nalingaw ang mga tawo nga nikuyog sa Suroy-Suroy nga bag-uhay lang natapos niadtong Biyernes, Enero 25 diin ang mga dapit sa habagatang Sugbo ang ilang gibisita.
“Everybody enjoyed, wala gyud silay mga second thoughts ba. As far as I know no, kanang last advisory, wa ko kadawat (naay cancelation sa reservations),” dason ni Costas. /(SCG, AZLG)