GIAWHAG ni Konsehal Joel Garganera ang mga hintungdan buhatan sa Cebu City Government pag-apprehend sa mga driver sa mga public utility vehicle (puv), trucks, ug pribadong sakyanan kinsa kusog mobuga og baga nga aso.
Si Garganera, kanhi chairman sa committee on environment sa konseho, nagkanayon nga usa sa labing dako nga nakatampo sa kahugaw sa gihanggap nga hangin sa tawo mao ang carbon moxide gikan sa mga sakyanan hilabi na niining nagkahuot nga trapiko sa siyudad.
Gipasabot sa konsehal mao ang Cebu City Transportation Office ( CCTO) ug Cebu City Environment and Natural Resources Office (CCENRO) sa pagdakop sa nakalapas sa gihimong balaod sa siyudad.
“The 10th Sangguniang Panlungsod passed Ordinance No. 2111, entitled 'An Ordinance providing for vehicle emission policies, providing penaties therefor and for other purposes,' padayag ni Garganera.
Ang konsehal sa north district niingon nga katungdanan sa CCTO ang pag-apprehend sa mga sakyanan nga kusog mobuga og aso. Kini kabahin sa pagpatuman sa nasudnong balaod sa Clean Air Act ug kampanya batok sa smoke belching.
Gitug-an usab niya nga ang CCENRO adunay gahom sa pagpatuman sa national laws ug local ordinances nga maoy nag-regulate sa pagbuga og aso nga makadaot sa kinaiyahan, water system, solid waste management policies ug uban pa kinsa maoy morekomenda o mopahamtang og silot.
Dugang ni Garganera nga sagad manggawas ang mga sakyanan nga kusog mobuga og aso hilabinna ang pasaheroan ug mga trucks atol sa kagabhion sanglit wala nay mga enforcer.
Ang konsehal niingon nga kon dili kini mahatagan og alibyo ug magpadayon kining maong mga sakyanan, posible magkasakit ang tawo sa iyang respiratory system nga maoy iyang gikabalak-an. (PAC)