BLANGKO pa ang National Bureau of Investigation (NBI)-Central Visayas sa motibo ug sa identity sa mga mamumuno nga nipa-ulan ug bala sa sakyanan ni San Fernando Mayor Lakambini Reluya naidtong Enero 22 sa Barangay Linao, syudad sa Talisay.
Apan ang ahensiya nakabuwelo na sa ilang imbestigasyon ug gani duna na kini nakuha nga mga footage gikan sa mga closed-circuit television (CCTV) camera sa mga establisemento duol sa nahitabo-an.
Gitug-an ni NBI-Central Visayas Assistant Director Dominador Cimafranca nga human nahitabo ang pagpamanhig sa sakyanan ni Reluya, nga gikamatay usab sa iyang bana nga si San Fernando ABC President Ricardo Reluya Jr. ug laing 2 ka mga tawo, nilusad gilayon sila ug motu propio investigation.
Hinuon, wala usab magdugay ug nakadawat ang ilang opisina ug request gikan kang Reluya sa miaging semana alang sa pagpahigayon ug imbestigasyon subay sa nahitabong pagpamanhig.
“Naabtan pud mi’g letter. Naay request pud si Mayor Reluya nga gipadala diri sa office,” niingon si Cimafranca.
Bisan ug duna na’y nakuha nga mga CCTV footage, giapdayag ni Cimafranca nga dili pa gyud sila makatumbok sa motibo sa krimen ug kung kinsa ang nihimo ug nagpaluyo niini.
Una nang miingon si Reluya nga politika maoy posibleng dako nga hinungdan nganong gibanhigan siya.
Taliwala niini, wala hinuon mahadlok ang mayor ug gani wala siyay plano pag-atras sa iyang kandidatura sa umaabot nga piniliay.
“Sa pagka-karon, as to the identity, blangko pa mi. As to the motives, wala pa gyud mi definite. We are looking at all other possibleng angles,” niingon si Cimafranca.
Kung ang kapulisan gihatagan ug duha ka semana pagsulbad sa krimen, gipadayag ni Cimafranca nga sila sa NBI-Centra Visayas wala ra’y gisunod nga timeline paghuman sa ilang imbestigasyon sa insidente.
Matod niya, kung mailhan na nila ang mga responsable, hayan nga sila na usab mismo ang mosang-at ug reklamo ngadto sa piskaliya batok kanila.