‘Suspek’ sa Reluya ambush

GIILANG most wanted sa syudad sa Talisay ug drug supplier sa Sugbo naengkwentro sa mga sakop sa Provincial Intelligence Branch (PIB) pasado alas 9 sa Martes sa buntag, Enero 29, sa sitio Crossing, Barangay Campo 4, Dakbayan sa Talisay.

Ang giingong nasamdan sa pagpakigpinusilay sa mga operatiba sa PIB giila nga si Jerome Cabuenas Labitad.

Sa dihang dakpon na unta nila si Labitad pinasikad sa warrant of arrest nga giluwatan ni Judge Glenda Go sa Regional Trial Court (RTC) Branch 65 sa syudad sa Talisay, nisukol kini kanila matod pa.

Si Labitad giingong usa sa mga nagbanhig sa sakyanan ni San Fernando Mayor Lakambini “Neneth” Reluya niadtong Enero 22 sa Barangay Linao sa syudad sa Talisay.

NAIGO

Matod ni Sr. Insp. Alejandro Batobalonos nga sa dihang moduol na unta sila, kalit lang sila nga gipamusil.

Giingong kauban usab ni Labitad ang iyang right hand nga usa usab ka gun-for-hire sa probinsya sa Sugbo nga si Felix Abacahan Jr.

Nakita pa ni Batobalonos nga naigo si Labitad sa pagbawos sa mga pulis sa walang tiyan sa dihang padung na niatras.

Sa dihang nahagba na si Labitad, giaswat siya sa laing duha ka mga kauban niini diin ang usa nailhan nga si Abacahan.

Nabilin pa ang dala niini nga M16 armalite rifle nga maoy gigamit sa engkwentro nga naa sa kustodiya sa PIB.

Wa na nila maabti ang mga suspek sa dihang daling nakaambak sa pangpang sa luyo sa ilang balay. Nalutsan og warrant of arrest sa kaso sa illegal nga drugas si Labitad uban ni Abacahan human gironda sa Talisay police sa miaging tuig.

Giingong sakop ni Steve Go ug Franz Sabalones si Labitad.

Gawas sa iyang pagka drug pusher, nalambigit usab kini sa gun for hire diin modawat kon dunay birahan, mapulitiko man o kadtong nakautang sa illegal nga drugas.

APIL SA AMBUSH?

Apan usa sa mga opisyal sa Police Regional Office 7 nga apil sa Special Investigation Task Group (SITG) nga nihangyong di nganlan, giila si Labitad sa usa sa mga security ni Mayor Reluya nga lakip sa mibanhig sa ilang sakyanan.

Sa pagkutlo ning balita dili pa makahatag sa impormasyon ang Cebu Provincial Police Office sanglit si PRO 7 Director Chief Supt. Debold Sinas ang mohatag sa tanang kasayuran.

Samtang mipatim-aw na ang mga saksi sa pag ambush kang Mayor Reluya ug giingong miluwat na kinig pamahayag sa SITG.

Matod ni Supt. Virgilio Bayon-on, nga atol sa case conference sa SITG, ilang gisubay ang mga anggulo nga pulitika, negosyo sa pamilya ug illegal nga drugas.

Gitinguha nila nga sa di pa ang duha ka semana nga ultimatum ni PNP Chief Director General Oscar Albayalde, ila nang masulbad ang pagpamanhig.

“Aduna nay kahayag ang imbestigasyon,” matod ni Bayon-on.

NBI INVESTIGATION

Bisan ang National Bureau of Investigation (NBI) 7 blangko pa sa motibo ug sa identity sa mga mamumuno.

Apan ang ahensiya nakabuwelo na sa ilang imbestigasyon.

Gani, duna na kini nakuha nga mga footage gikan sa mga closed-circuit television (CCTV) camera sa mga establisemento duol sa nahitabo-an, matod ni NBI Assistant Regional Director Dominador Cimafranca.

Samtang, si Mayor Reluya niluwat og public statement nga bisan pa sa nahitabo, padayon siya sa iyang tinguha nga magpapili gihapon sa pagkamayor karong Mayo 2019.

Iyang giawhag ang SITG nga tumanon ang direktiba niAlbayalde nga solbaron ang krimen sulod sa duha ka semana sukad niadtong Enero 22.

Nagpasalamat usab siya sa dakong suporta ug pagbati nga gipakita sa iyang mga konstituwente sa San Fernando ngadto niya ug sa iyang bana labi na niadtong Dominggo, Enero 27, atol sa paghatod sa lawas ni Nonoy gikan sa Cebu City ngadto sa ilang lungsod.

Nagpasalamat sab siya sa Malacañang, mga ahensiya sa gobiyerno ug tanang grupo nga nagpadayag sa ilang kaguol ug suporta alang kaniya ug katong mga hintungdan.