Todino: Asa na ang kalinaw

BAG-O lang gihimo ang plebisito sa planong Bangsamoro Organic Law (BOL) nga motukod og usa ka autonomous region hulip sa Autonomous Region in Muslim Mindanao.

Gipaboran sa mga Muslim ang BOL sa pagtuo nga masulbad ug mahunong na kining pag-alsa sa rebelyon sa ilang dapit diin nilakas na og sobra sa 150,000 ka mga tawo sulod sa lima ka dakada.

Gawas sa ubang dapit sa Muslim, ang mga botanti sa Jolo nisalikway sa maong organic law alang sa Bangsamoro.

Usa ka semana human sa plebisito diin nagpabor sa maong balaod, nahitabo kining pagpamomba sa simbahang Katoliko sa Jolo.

Basi sa ulahing report niadtong Domingo, moabot na ngadto sa 27 ang nangamatay og kapin sa gatos ang nanga-angol. Ang mga biktima sagol dunay sibilyan duna say sakop sa kapolisan ug militar.

Wa pay miangkon nga responsabli sa pagpamomba. Apan, daghan nang mitunaw nga mga pagduda basi sa pasiunang imbestigasiyon.

Ang labing klaro karon mao nga dili gyud tawhanon ang maong kalihukan.

Klaro nga binuhatan kini sa mga terorista, sa mga grupo nga supak sa programa sa gobiyerno.

Apan, unsa may dakong mensahi nga gipadangat sa mga responsabli sa pagpamomba. Nganong diha man gyud gitanom ang bomba sa simbahan?

Dili ba kaha gipasantop nila nga wa silay respeto sa Ginoo tungod kay lain nga Dios ang ilang gialagaran? Dili ba kaha nga duna silay kaligotgot sa mga deboto sa pagtuo nga Katoliko Romano?

Wala ba kaha kini’y kalabotan sa teroristang kalihukan gawas sa nasod ug gidala dinhi sa atong tugkaran? Kinsa may nagpaluyo ani?

Basi sa imbestigasiyon, gitanom ang bomba sulod sa simbahan, ang laing bomba gibutang gawas sa pultahan. Nagpasabot kini nga tumong gyud sa mga responsabli nga hutdon pagpatay ang nanimba ug walay ipa-eskapo.

Dili kini maoy unang higayon sa pagpamomba sa Jolo ug sa ubang dapit nga Muslim area. Apan, nagpadayon ug nagkadako na ang pagpangataki.

Unsa man gyud ang labing epektibo nga solusiyon niining kagubot sa pipila ka bahin sa Mindanao? Kon dili kini masulbad kanunay mabutang sa peligro ang kinabuhi sa mga sibilyan ug inosente.

Karong panahona, mura dili gyud luwas kon anaa ka sa pundok sa katawhan, bisan naa ka sa simbahan nga malinawon nag-ampo.

Ang kalinaw karon diha ra gyud mabatnan sulod sa imong kinabuhi kon gipasud nimo sa imong kasingkasing si Hesu-Kristo. Kon mawala man imong kinabuhi apan buhi ka nga mosugat sa iyang ika-duhang pagbalik sa kalibutan.