GIDALA sa Regulatory and Complaint Board (RCB) ang napulo ka mga menor de edad human nasiplatan nga anaa sa baybayon niadtong Lunes, Enero 28, sa Barangay Bonbon, dakbayan sa Cagayan de Oro.
Lakip nga gibitbit sa RCB ang tulo ka mga nag-edad og 18 anyos nga mga kauban niini nga anaa sa maong dapit bisan pa man nga oras sa klase.
Gihimangnoan ni Antonio Resma Jr., secretary sa RCB ug Inspectorate team leader, ang mga ginikanan sa pagmonitor kanunay sa ilang mga anak ilabi na sa susama niini nga mga panghitabo diin wala na kini sila'y mga klase apan naglatagaw sa bisan asa nga dapit.
“Gitawagan sab ang ilang mga ginikanan o ilang guardians para mapasabot, mapahibalo although wala na sila'y klase, naa gihapon sa bisan asa imbes mopauli na, imbes magtuon,” matud ni Resma.
Gidugang pa niini nga susama nga nagpasumangil lamang ang mga menor de edad nga maghimo og proyekto ilabi na nga gibutyag sa tunghaan nga dili gayud sila maghatag og mga proyekto ilabi na diha pagabuhaton sa mga dapit nga dili angayan.
“Miingon ang mga batan-on nga naa sila’y classmate nga taga didto, maghimo daw sila og project, pag-verify nato sa school officials tuod wala na silay klase pero niingong nga bawal gyud nang maghimo og mga projects labaw na sa mga dapit nga ingon ana,” dugang niini.
Gidugang pa usab nga makitang nagpalusot lamang ang maong mga menor de edad kinsa miingon nga magrekord kini og kanta sa maong dapit ug gani bitbit pa ang gitara tungod kay kabahin matud kini sa ilang proyekto sa tunghaan.
“Mag-record daw sila og kanta gipangutana namo nganong dili sa eskwelahan nga mas saba man hinuon sad didto, dili ta gusto moingon nga nagpasangil pero masabtan na gyud siguro nga nagpalusot ra gyud to sila,” dugang niini. (KCS)