MAASIN City, Southern Leyte - Hugot nga seguridad ang gipatuman karon lukop lalawigan sa Southern Leyte tungod sa report nga dunay armadong mga tawo nidunggo sa lungsod sa Libagon ug Silago.
Sa pakighinabi sa Superbalita Cebu kang Maasin City Police Chief, P/Supt. Mark Nalda, iyang gikompirmar ang report.
Matod ni Nalda, duna karoy gitawag nga “condition orange time” ang Southern Leyte gumikan sa posibleng hulga.
Pasabot niini, ilang gitutukan ang mga oras nga posibleng dunay pangatake.
“Wala ta kahibawo karon og asa dapit ilang target. But mao na karon ang among gimonitor. Ang Silago pabor ni siya sa Samar area while ang Libago pabor from Mindanao,” matod ni Nalda.
Dugang ni Nalda, verified na ang report ug usa sa ilang gisusi kon kinsa kini nga grupo.
Ang report ilang nadawat sa una pa nahitabo ang pagpamomba sa Jolo nga nikalas og 21 ka mga kinabuhi.
Pasabot ni Nalda, way angay ikahadlok ang publiko sa maong report kay nakaandam na ang kapulisan ug kasundalohan lukop lalawigan ug rehiyon.
“Dili ni ato paghatag og panic but awareness sa public to be vigilant sa palibot. Ug naa gani mabantayan nga kadudahan og lihok, palihug report dayon sa duol nga police station aron ma verify,” awhag ni Nalda.
Gipasabot usab ni Police Regional Office (PRO) 8 Director Dionardo Carlos, nga wa pa hinuon gipaubos sa red alert status ang rehiyon apan padayon ang ilang monitoring.