SAN Jorge, Samar - Giklaro sa Philippine Army nga di tinuod ang pasangil sa National Democratic Front - Eastern Visayas (NDF-EV) nga papason ang usa ka barangay sa lungsod sa San Jorge, Samar.
Matod sa 63rd Infantry Battalion sa Philippine Army, ang maong pahayag nigawas human nila napuhag ang dakong kampo sa Eastern Visayas Regional Party Committee (EVRPC) sayo ning buwana atol sa engkwentro.
Ang kampo nahimutang duol sa proper sa Barangay Bay-ang.
Ang Barangay Bay-ang ang gitumbok sa NDF nga papason sa Armed Forces of the Philippines kon di mamahawa ang mga residente.
Dugang sa Philippine Army, mismo ang kapitan sa barangay nga si Lorna Badiola niklaro nga sila mismo boluntaryong nibakwit gikan sa lugar sa kahadlok sa di maayong binuhatan sa NPA.
Giklaro ni Badiola nga di tinuod nga gipwersa sila sa kasundalohan sa pagpahawa sa lugar.
Matod sa 63rd IB, wa usab silay komunikasyon nga ilang gipaabot kang Badiola bahin sa giingong pagpapahawa.
Gani, miingon usab ang 63rd IB nga wala sila nagpugong sa mga evacuees nga mamalik sa ilang gibiyaan nga mga balay.
Matod sa 63rd IB, dunay 38 ka mga pamilya gikan sa Barangay Bay-ang ang naa karon sa evacuation center.
Ang kasundalohan ug lokal nga kagamhanan nagtinabangay aron mahatagan sa ilang gikinahanglan ang mga evacuees.
Gani, giduol sa kasundalohan ang Department of Education alang sa pagpadala og magtutudlo niadtong apektadong mga tinun-an.
Nakadawat usab og report ang kasundalohan nga dunay mga pamilya gikan sa Barangay Calundan sa samang lungsod ang mobakwit gumikan sa kahadlok sa NPA.
Ang Philippine Army niingon nga ang pahayag sa NDF usa lang ka pagpanglingla ug pag-ilad sa publiko aron matabonan ang krimen nga ilang nabuhat. (JKDP)