GIHULAGWAY sa Cebu City Environment and Natural Resources Office ( CCENRO) nga ‘dead river’ ang lima ka mga sapa nga nahimutang sa urban barangay sa dakbayan sa Sugbo.
Kini ang gibutyag ni Nida Cabrera, pangulo sa CCENRO, gumikan sa grabeng hugaw nga maoy hinungdan sa polusyon ug kontaminasyon.
“Ang downstream nato gitawag na gyud na nato og dead rivers kay highly polluted ug highly contaminated, so wala na gyuy mga isda nga mabuhi diha gawas sa ibabaw nga naapa,” matod ni Cabrera.
Ang lima ka mga dagkong sapa nga nilagbas sa mga urban barangay mao ang Mahiga creek, Butuanon river, Lahug river, Bulacao ug Guadalupe river maoy gikonsiders sa CCENRO nga mga dead rivers, subay usab sa eksaminasyon sa tubig diin nasuta nga adunay presensa sa hugaw sa tawo.
Karong Biyernes sugdan sa CCENRO, inabagan sa Provincial Environment Natural Resources Office (PENRO) nga nagbase sa lungsod sa Argao, ang pagsuhid sa Bulacao river para sa documentation nga gikatakdang mahuman sulod sa tulo ka adlaw. Ipahigayon ang dialogue uban sa mga barangay official, mga molupyo ug mga tag-iya og business establishment karong Pebrero 20.
Hingpit nga sugdan ang clean-up sa down stream sa Pebrero 22 nga langkuban sa mga personnel sa CCENRO, PENRO, Bulacao, mga balay patigayon ug residente aron mahibalik ang kalimpyo sa 11 ka kilometro nga sapa.
“We hope bisan class D nalang nga magamit bisan sa fishing ug naay mabuhi nga isda. Mao nay gi-expect nato diha after sa clean-up. Sa pagkakaron out of classification pa (ang atong mga sapa),” dugang padayag ni Cabrera.
Sa pagkakaron, wala pay pundo ang CCENRO para sa river clean-up apan matod ni Cabrera nga iyang iduso ngadto sa buhatan ni Mayor Tomas Osmeña nga mahatagan og pundo.
Ang pangulo sa CCENRO nagkanayon nga dilikado na kaayo ang tubig sa Bulacao ug kon dili kini mahatagan og alibyo, peligro nga masakit ang mga tawo. (PAC)