GILAUMAN nga sa ikatulong semana sa Pebrero makarga na ug mahipos ang nahibilin nga 5,100 ka tonelada sa illegal nga basura gikan sa nasod sa South Korea nga nagpabilin pa sa lungsod sa Tagoloan, Misamis Oriental.
Nabiyahe na pabalik ang naunang 50 ka tonelada niadtong ikaduhang semana sa Enero.
Gibutyag ni Provincial Board Member Gerardo Sabal nga nalipay sab siya nga ang legal counsel sa Verde Soko nga kompanya nagpadala og sulat kanila pagpahibalo nga ipanulod na ang basura sa canvas bag ug mahidangat na usab ang pressing machine nga gikan sa Korea.
“Sa third week sa February ma ship-out na ang basura,” matud niini.
Ang inter-agency task force nga gilangkuban sa kagamhanan sa probinsya sa Misamis Oriental, Lokal nga kagamhanan sa lungsod sa Tagoloan, ang Department of Environment and Natural Resources, Bureau of Custom, ug National Bureau of Investigation nagpatabang na sa gobyerno sa South Korea nga matabangan sa shipping cost niini.
Nasayran gikan ni Sabal nga mokabat sa P8 milyon ngadto P10 milyon ang kantidad sa shipping sa pagpabalik sa 5,100 ka tonelada sa basura.
Sa pagkakaron ila pa kining gi finalize para mawala na ang gikabalak-ang basura nga posibleng maghatag og sakit. (SVB)