MISAKMIT ang Misamis Oriental sa Department of Interior and Local Government (DILG)- Bureau of Local Government Supervision (BLGS) og good financial housekeeping.
Gikalipay kini ni Misamis Oriental Governor Yevgeny Vincente Emano tungod nagpakita nga transparent iyang pagpangalagad sa katawhan sa lalawigan.
Nagpasabot lang sab nga wala giabusahan ang kwarta nga alang sa katawhan.
Nakadawat sab og susamang pasidungog ang 22 ka mga munisipyo gawas lamang sa lungsod sa Opol.
Ang duha ka dakbayan sa Misamis Oriental mao ang El Salvador ug Gingoog nakasakmit sab niini.
Mokabat sa 98 ka mga local government units nga gi-evaluete sa BLGS sa Northern Mindanao, 74 ka local government units o 76 porsiyento ang mipasar sa assessment nga gilangkoban sa upat lamang ka probinsya, walo ka dakbayan, ug 62 ka munisipyo.
Lakip ang mga dakbayan sa Cagayan de Oro, Malaybalay, Valencia, Iligan, Oroquieta, Ozamiz, El Salvador, ug Gingoog.
Samtang 15 ka munisipyo ang nakasulod sa Bukidnon, tulo sa Camiguin, 15 sa Lanao del Norte, ug pito sa Misamis.
Ang Misamis Oriental maoy adunay pinakadaghang munisipyo nga awardee niini nga moabot sa 22 o 23 ka lungsod.
Ang good financial housekeeping usa ka proyekto sa DILG nga moila og local nga kagamhanan labina sa maayong performance sa internal financial housekeeping sama sa local legislation, development planning, resource generation, allocation and utilization, customer service, human resource management and development, ug valuing fundamental governance. (SVB)