PATAY ang usa ka maestra human gidunggab sa iyang kanhi uyab sa sa Barangay Hindang, Iligan City, Lanao del Sur.
Giila ang maestra nga si Cheryl Dologuin, 36.
Sa inisyal nga report sa Iligan City Police Office nasuta nga nahitabo ang insidente niadtong adlawng Huwebes, Enero 24, samtang nageleksyon ang maestra ngadto sa iyang mga tinun-an.
Giingong kalit nga mosulod sa classroon ang kanhi uyab ni Dologuin nga si Albert Dara Bansalao, taga Lakewood, Zamboanga del Sur, usa ka security guard ug gidunggab siya niini.
Nakasinggit pa ang biktima nga ipagawas ang iyang mga tinun-an aron dili maapil.
Gipangita na sa kapolisan ang suspek karon nga nakasibat human sa pagpangluba patay.
Nasuta nga nag-ila-ila ang duha kaniadto dihang maestra si Dologuin sa Alternative Learning System ug iyang tinun-an si Bansalao.
Nagkauyab ang duha hangtod nga mibalhin si Dologuin sa Bacuitana Elemetary School.
Apan dihang nahibaloan niini nga minyo si Bansalao iya kining gibulagan deretso ug giingong nakauyab og lain aron undangan siya og sinamok sa suspek, butang nga dili madawat ni Bansalao.
Gani kanunay na niining gahulgaon si Dologuin nga iyang patyon kung di makigbalik kaniya.
Ang kapolisan padayon pa sa pagpangita sa suspetsado labina singgit sa pamilya hustisya sa kamatayon niini. (SVB)