NAGTAGAY mig tuba atong adlawa, nag sound trip. First year high school mi ato. Usa sa among barkada, iyang maguwang rakista, nananghid nga mouli kadiyot. Naa kuno siyay kuhaon sa ilaha. Pagbalik niya nagdala siyag cassette tape, album sa usa ka banda. Ang nakasuwat sa cover: The Best of Juan de la Cruz.
Among gi-play ang tape. Gitara ang intro sa unang kanta. Bugnaw, kalma, wa nagdali, sama anang mag-stroll ka sa baybayon. Ug dayon nakaging ko pagsud sa lyrics:
Ako’y nag-iisa
At walang kasama
Di ko makita
Ang ating pag-asa
Ang himig natin
Ang inyong awitin
Upang tayo’y magsama-sama
Sa langit ng pag-asa
Tungod ba kaha to sa tuba nga pwerteng asloma, o sa sinugbang tulingan nga katol-katol na, wa ko katingog. Wa ko kahibawo unsay akong reaksyon. Wa ko kalihok. Mora kog kandila nga giugbok. Nagsige na lang kog tutok sa cassette player samtang nagpadayon ang kanta.
Ako’y may kaibigan
At siya’y nahihirapan
Handa na ba kayong lahat
Upang s‘ya’y tulongan
Kinsa man ning animalang bandaha ni nga lahi man nig tama nako? Gipaminaw namo ang ubang mga kanta sa tape: Balong Malalim, Beep Beep, Kagatan, Tetsir’s Enemi No. 1, ug daghan pa.
“Piste ning bandaha,” nakapamalikas ko. “Pun-i pag usa ka galon ‘nang!”
Kabantay mo anang human ka makasuway sa usa ka butang sa unang higayon imong pamati nausab imong kinabuhi? Ingon ana akong nasinati human nakog paminaw sa mga kanta sa Juan de la Cruz. Mora kog natawo og usab. Mora kog nagpuyo sa pagkaignorante kaniadto ug karon sweto na ko sa kinabuhi.
Dili pa klaro sa akong linghod nga panghunahuna atong adlawa, apan nakaingon ko nga puhon motandog sab ko og daghang tawo sama sa gibuhat sa Juan de la Cruz nako.
Pagkadungog nako sa balita nga namatay na si Joey “Pepe” Smith, labing sikat nga membro ug songwriter sa Juan de la Cruz, niadtong Lunes, namalik ang mga kasinatian nako sa bata pa ko kauban ang ilang mga kanta - ang mga hubog-hubog, ang mga panahon nga ako sabog, ang barkada, ang among pagkabadlongon sa eskuyla, ang among pagkarebelde, ang mga babaye nga among giawayan, ang among nawong nga gibugas.
Mi-contact nako ang usa sa mga newspaper nato diri sa Sugbo aron pangayoan kog reaksyon sa pagkamatay ni Pepe Smith. Ug mao ni akong tubag:
“Our country just lost its only genuine rockstar. Being a rockstar is a lifestyle, and only Pepe lived that kind of life. He was an original. He was a pioneer. He influenced me and my band to do the same in Cebu - to try something new and different when we started.”
Paghuman nakog send sa akong reply, migawas ko ug nangitag tuba nga pwerteng asloma ug sinugbang tulingan nga katol-katol na.