SO, LIMA ka mga sapa sa dakbayan sa Sugbo ang giila ni kanhi konsehal Nida Cabrera nga mga “dead rivers,” o mga hugaw ug kontaminadong sapa nga naghatag og hulga sa panglawas sa mga tawo.
Gitumbok ni Cabrera, kinsa mao karon ang pangulo sa Cebu City Environment and Natural Resources (CCENRO), ang Mahiga Creek sa Barangay Mabolo, Butuanon River nga nagtadlas sa Barangay Binaliw, Bacayan ug Talamban, Lahug River, sapa sa Bulacao ug Guadalupe.
Tinguha karon sa CCENRO nga malimpiyohan na maong mga sapa nga bisan og dili man tuod hingpit nga mahibalik ang iyang kaniadto, basta lang dili siya hugaw ug luod nga tan-awon sa publiko. Labaw sa tanan dili usab makahatag og risgo sa panglawas, ilabi na sa kabataan.
Nindot ni og matinuod gyud, kay sa pagkatinuod lang, dili nato ikalalis nga hataas na ang panahon nga daghan nang nangreklamo ning mga sapaa tungod sa kahugaw ug sa kabaho niini nga mahanggap sa mga tawo.
Pila na usab ka katuigan ug pila na usab ka administrasyon nga nangagi ang wala gyud mohatag og pagpakabana niini.
Kini maoy dakong hagit ni Cabrera ug sa pamunoan ni Cebu City Mayor Tomas Osmena.
Ang pagpakig-ayuda sa mga hingtungdan ahensiya sama sa Department of Environment and Natural Resources (DENR) ug sa ubang sektor sa katilingban maoy dakong gabay aron kini kahatagan og katumanan.
Ang Manila Bay pananglitan, kinsa may magtuo nga mahiuli ug mosilaw pagbalik ang kaanindot ug kalimpiyo sa palibot niini nga napasagdan lang sa hataas nga panahon.
Pero mora man og nakalimtan ni Cabrera ang sapa sa D. Jakosalem street nga anaa sa luyo sa Gaisano Main sa dalan Colon .
Iapil lang sab unta ni kay bantang raba kaayo sa mga mangagi ang nagtipun-og ug nagsagolsagol nga basura sa maong sapa.