WALA pa mahuman ang plebisito kalabot sa Bangsamoro Organic Law (BOL) nga gituohan nga maoy mohatud sa kalinaw sa Mindanao, ubay-ubay na ang kinabuhi nga nakalas sa pagbusikad sa duha ka bomba didto sa Jolo ug Zamboanga. Tungod sa panghitabo makapangutana kita, makab-ot pa ba ang kalinaw sa Mindanao?
Dunay mga katawhan nga gigamhan sa pagkadautan ug ilang kalipay ang kasakit nga mahiaguman sa uban tungod sa ilang pagkawalay puangod. Apan akong giingon sa milabay nga semana nga daan nang gipahibalo sa Labaw nga Makagagahum ang umalabot sa kalibutan.
Kon duna kay Bibliya nga imong gitagoan o gitipigan atong tun-an ang sugilanon nga makita sa ikaduhang kapitulo sa basahon ni Propeta Daniel sa Daang Tugon.
Gipakita sa Ginoo kang haring Nabucodonosor pinaagi sa damgo àng usa ka dakong larawan apan sa iyang pagmata wala siyay nahinumdoman. Hinungdan sa iyang kalibog. Walay usa sa manggialamon nga tawo sa Emperyo sa Babilonia ang makasulti unsa ang iyang nakita sa damgo.
Niadtong panahona si Daniel nga usa ka Hudeyo, usa sa mga bihag sa Emperyo sa Babilonia, maoy nakaluwas sa mga giingon nga mga maalam kay gipakita sa Diyos kang Daniel ang damgo sa hari ug gipasabot unsay kahulogan sa dakong imahe nga nadamgohan ni haring Nabucodonosor.
Sa Bersikulo 31-35, gisaysay ni Daniel ang usa ka dakong larawan diin ang ulo bulawan, ang dughan ug bukton salapi, àng tiyan ug mga paa tumbaga (bronse) ang bitiis puthaw, ang mga tiil may bahin mga puthaw ug yuta nga kolonon apan dunay usa ka dakong bato ang milapdos sa larawan ug kini nadugmok ug nahanaw diin ang dakong bato nahimong usa ka dakong bukid nga milukop sa kalibutan.
Matag bahin sa larawan nagrepresenta og gingharian ug kapanahonan.
Ato kining himayhimayon sa pagtuon aron atong masabtan ang kahulogan ug masuta asang bahina na kita karon sa maong larawan. Atangi ang sunod nga isyu sa Yanong Pagsabot.