PULIS nga una nang nadakpan human mangilkil sa ilang dinakpan gibalhog sa Abellana police station station tungod sa pagdala og paltik nga armas sulod sa Police Regional Office 7 atol sa gilusad nga inspeksyon.
Niadtong Lunes sa buntag Enero 28, mihimog surpresa nga inspeksyon ang PRO 7 sa ilang mga personnel kon kini nag sul-ob bag sakto nga uniporme ug kon misunod ba sa mando sa ilang mga labaw.
Apan usa kanila ang gipaposasan human masuta nga nagtakin kinig paltik nga kalibre .45 nga ginama sa dakbayan sa Danao. Ang pulis giila nga si PO3 Ritche Saquilabon, sakop sa Regional Personnel Holding Unit sa PRO-7.
Matod ni PRO 7 Director Chief Supt. Debold Sinas nga hugot nga gidili sa mga pulis ang pagdalag di lisensyado nga armas ilabi nag paltik nga di mahimong irehistro.
“Kasi part sa directive sa taas (Camp Crame) dapat ang pulis ang dad-on lang kadtong issued firearm. So, dili mi authorized magdala og mga paltik nga homemade or unregistered firearm. So, that’s why we are conducting regular inspection,” matod ni Sinas.
Gibalhog si PO3 Saquilabon sa Abellana police station ug mag atubang matod pa kinig kaso may kalapasan sa Comelec gun ban ug illegal possession of firearms.
Iyang gipasabot nga ang mga pulis nga nakauniporme exempted sa gun ban, apan kinahanglan nga ang iyang armas isyu gikan sa gobyerno.
Kon ugaling kaugalingong armas, kinahanglan aduna kini lisensya ug adunay permiso sa Commission on Elections (Comelec).
Si Saquilabon unang nadakpan sa mga sakop sa Counter Intelligence Task Force 7 human giingong mangilkil sa ginikanan sa ilang dinakpan sa illegal nga drugas sa dihang sa Parian police station pa kini na destino niadtong 2017. Tungod niini, giimbarguhan siya sa iyang service firearm. nagpadayon pa pagdungog ang iyang kaso.
Ning bag-ong kaso sa maong pulis,gipadali ni Sinas pagresulbar sa unang kaso ug gitinguha nga ipataktak kini sa serbisyo.
Gisuwayan pagkuha sa iyang habig si PO3 Saquilabon sulod sa selda sa Abellana police station apan nagdumili kini pagtubag. (AYB)