SUTAON karon sa komitiba sa enerhiya sa Provincial Board ang kalabot sa report ni Misamis Oriental Board member President Elipe, nganong adunay 10 ka pamilya sa lungsod sa Villanueva nga giingong wala gihatagan og endorsement letter gikan sa munisipyo aron makutayan og linya sa kuryente.
Ang maong pamilya giingong taod-taod na nagsige og hangyo sa ilang munisipyo aron mataoran og sugang dagitabnon apan walay endorso gikan sa munisipyo.
Matud ni Elipe nga sa iyang paglibot suroy nadiskubre ang hangyo niining mga pamilya nga dugay na wala kasinati og kuryente.
“Naa kitay nasuroyan didto sa Villanueva nga mga igsuon nga nagreklamo sila kay wala pa sila tagai og endorsement para kutay og kuryente sa Cepalco,” matud ni Elipe.
Nanghinaot kini nga dili tinoud ang alegasyon nga tungod adunay pagpamolitika.
“Atong iduso sa committee sa energy nganong ingon ani ang nahitabo, para in aid of legislation atong mapangitaan og pamaagi nga kini sila mga tawhana nagkinahanglan og sugang dagitabnon dili sad siguro mapihig, kay matud pa allegedly tungod kuno adunay political undertones,” dugang butyag niini.
Apan bout niining mahimong patas sab sa maong lungsod.
“But then again it would be unfair pod sa lungsod sa Villanueva kung ato silang akusahan nga tungod sa pamolitika, so mas maayong ato silang maimbitar para ato sad silang madungog kung unsa sab ilang mga rason nganong dili gyod nila eendorsar ang maong aplikasyon didto sa Cepalco, nga hangtod karon adunay pipila ka mga wala matagai og sugang dagitabnon,” matud ni Elipe ug nagpaabot sa tubag gikan sa kagamhanan sa Villunueva. (SVB)