UPAT ka mga gitouhang lider sa New People’s Army (NPA) ang nasikop pinasikad sa search warrant niadtong Miyerkules, Enero 30, sa lungsod sa Villanueva, Misamis Oriental.
Nasikop sa hiniusang pwersa sa Misamis Oriental Provincial Police Office (Moppo), Criminal Investigation and Detection Group- Northern Mindanao ug kasundalohan sila si Marivic Coleta, Mylene Coleta, Anabelle Manseguiao, ug Jerry Basahon.
Duha ka mga search warrant ang giisyu sa korte nga aduna silay kasupakan sa Republic Act (RA) 10591 kon pagbitbit sa armas ug bala samtang sa RA 9516 ang kasupakan sa pagdala og eksplosibo.
Si Police Inspector Princess Joy Enriquez tigpamaba sa Moppo niingon nga adunay report nga nadawat ang kapolisan kalabot sa ilang paghupot og armas hinungdan nga giaplayan og search warrant sa korte.
Nagpositibo kini ang operasyon ug nakuha sa ilang posisyon ang hand grenada, usa ka land mine, ug kalibre 45.
Gikostudya na karon ang mga dinakpan sa buhatan sa Criminal Investigation and Detention Group.
Wala sab gikumpirma sa kapolisan nga adunay mga gagmayng bata nga dala sa mga naaresto ug lakip sa wala gikumpirmar nga membro sila sa Misamis Oriental Farmers Association (Mofa).
Sa opisyal nga pahayag sa grupong Kilusang Magbubukid ng Pilipinas (KMP)-Northern Mindanao hugot nilang gikondena ang pagsikop sa mga mag-uuma.
Giingon sa grupo nga gitamnan og mga eksplosibo lakip armas ang sulod sa buhatan sa Mofa samtang anaa sa sulod ang lima ka mga naaresto.
Gikasubo sab sa grupo ang pagkasikop sa KMP-Northern Mindanao leader nga sila si Ireneo Udarbe ug Lumad leader Datu Jomorito Goaynon kinsa unang gireport nga missing.
Hugot kining gikondena sa grupo tungod pagyatak kini sa katungod sa mga mag-uuma ug mga lumad.