GIAWHAG ni Davao City Health Officer (CHO) Josephine Villafuerte ang mga delegado ug opisyal sa nagpadayon nga Davao Region Athletic Association (Davraa) Meet 2019 nga segurohon nga maayo ang kondisyon sa panglawas sa mga atleta human sa pagkamatay ni Hadia P. Eronico, 12-anyos nga magduduwa sa elementary girls volleyball nga taga Davao Oriental tungod sa dengue fever.
Si Villafuerte, sa pakighinabi uban sa SunStar Davao kagahapon samtang iyang gisusi ang Imelda Elementary School sa Barangay Sto. Nino, Tugbok District ning siyudad Davao, nga maoy puy-anan sa delegasyon sa Davao Oriental, nagbutyag nga una ang mga tinun-ang atleta makaduwa, isyuhan sila og medical certificate nga nag-sertipikar nga sila dunay maayong kondisyon sa lawas nga moduwa sa Davraa Meet 2019.
Dugang ni Villafuerte nga ang natala nga mga kaso sa kalintura sa Imelda Elementary School gumikan sa kabugnaw sa panahon sa dakbayan sa milabay nga mga adlaw.
Matud niya nga ang pagpunay og ulan ug grabeng pisikal nga aktibidad mahimong makaapekto sa kondisyon sa panglawas.
Apan gisulti niya nga way angay nga ikataranta tungod walay rekord nga mga kaso sa kalit nga pagtaas sa dengue-related nga insidente.
"Kaduha pod ta nag-fogging sa school diria to ensure na walay mga lamok," tin-aw ni Villafuerte nga dugang nagkanayon nga ang kamatayon ni Eronico gumikan kay duna na siyay dengue una siya mianhi sa siyudad sa Davao.
Sukwahi sa mga taho nga nigawas nga si Eronico namatay sa pneumonia, gikompirma ni Southern Philippines Medical Center (SPMC) chief of medical professional staff doctor Ricardo B. Audan nga dengue fever maoy hinungdan sa iyang kamatayon tungod nakasinati siya og "failure of multifunction of organs."
Samtang si Davao Oriental discipline in-charge William Jova nagsulti nga wala sila magkuwang og monitor sa kondisyon sa ilang mga atleta.
"Katong pagkabalo namo nga gihilantan siya, wala na pod namo siya gipadula," matud ni Jova ug dugang nagkanayon nga sila sab nakurat sa seryusong sakit nga naa na sa bata sa dihang gidala sa SPMC kon diin siya gideklara nga patay alas 7:30 sa gabii niadtong Enero 30.
Subay sa imbestigasyon sa Tugbok Police Station buntag sa adlaw nga Miyerkules gidala sa SPMC ang biktima nga si Eronico, babaye, dunay relihiyong Islam, ug molupyo sa Mugbong Cogon Banaybanay, Davao Oriental human nakasinati og pag-ubo ug dunay dugo nga migawas sa kada ubo niini.
Dugang pa nga bag-o pa gidala ang bata sa ospital sayo sa buntag sa samang adlaw, namatikdan nga naghigda lamang sa higdaanan ug wala mikaon, busa giduol sa iyang coach ug gipakaon.
Apan namatikdan ang pag-ubo niini nga dala dugo, hinungdan nga gihatud sa clinic ug dayon sa ospital.
Apan gabii sa adlaw nga miyerkules gideklara kini sa doktor sa SPMC nga patay na ug ang hinungdan mao ang "failure of malfunction of organs."
Patay nga lawas sa atleta gidala na sa ilang dapit.
Sa pikas bahin, gibutyag ni Villafuerte lahi nga paghinabi sa telepono uban sa SunStar Davao nga unom ka magduduwa sa volleyball gikan sa Island Garden City of Samal (Igacos) nakasinati sab og pagsakit sa tiyan tungod nalanag sa pagkaon og pan-os nga kan-on niadtong Enero 30.
"Negative naman ang fecalyis nila, stool exam pero sa history kasi nagkain sila ng rice na sira na parang panis na... so far na treat na sila kahapon, okay na sila ngayon," pasalig niya.