MAPASIGARBOHONG gipahibalo sa tigpasiugda sa A Million Thanks raffle promo, nga sa ikaduhang pagbola karong Pebrero 16, ang bag-o lang nibalik sa nasud nga kanhi Pinoy Big Brother housemate Marco Gallo ang pinasidunggang dinapit.
Si Gallo molingaw sa motambong didto sa Gaisano Balamban ug mobunot sa tiket nga nagtangag og Mazda3 nga ganti.
Swerte ang Gaisano Main ug branches sa Country Mall, Balamban, Bogo ug Moalboal kay sila gyud ang unang nakakuha sa serbisyo sa batan-on ug ambongang aktor human kini temporaryong nipahulay sa pag-artista ug mipa-uli sa Italya.
•••
Sa ako nang nasulat sa niaging semana may bag-ong proyekto sila si Liza Soberano ug Enrique Gil nga gitagana alang sa mga managhigugmaay sa bulan ug adlaw sa gugma.
Kon way kausaban, Spoliarium ang ulohan sa maong pelikula nga giproduce sa Black Sheep, ang bag-ong sanga sa ABS-CBN.
Giingon nga mga estudyante nga managlahi og taras ug panglantaw ang papel sa duha diin human sa walo sa tuig ipakita kon natuman o nakab-ot ba nila ang ilang mga damgo.
Gitakda nga isalida ang pelikula sa besperas sa Valentine’s Day, Miyerkules, Pebrero 13.
•••
Morag derideretso na gyud ang pag-ariba sa Viva Films sa paghimog pelikula. Human sa 100 Tula Para Kay Stella ug Sid & Aya (Not A Love Story), may tagana na usab ang kompaniya (katambayayong ang BluArt Productions ug XL8) alang sa mga mahiligon sa mga istorya sa gugma.
Kini mao Hanggang Kailan, unang panagpares nila ni Xian Lim ug Louise delos Reyes.
Kataw-anan nga imbes magsaulog sa ilang ikaduhang kasumaran isip magtiayon nakahukom man hinoon ang duha nga putlon ang ilang relasyon sa mao mismong adlaw.
Pero sa wala pa sila mobabay sa usag-usa, nibakasyon una ang duha sa Japan diin taliwala sa maanindot nga mga talan-awon, magsubo ang ilang mga kasingkasing tungod sa ilang nahukman nang panagbulag bisan pa kon nahigugma pa sila sa usag-usa.
Makalibog? Mao nay giingon sa direktor sa pelikula nga si Bona Fajardo nga sige-sigehon lang gyud ang pagtan-aw sa mga pelikula nga paborito kay makita ra sa tumatan-aw ang ilang gipangita nga kaanindot.
Ang XL8 diay nga usa sa mga nagpaluyo ning pelikula ni Xian Lim ug mao ni iyang bag-ong proyekto human siya moapil sa Maharlika Pilipinas Basketball League isip magdudula sa Mandaluyong El Tigre.
Kuyaw sab diay ni si Xian Lim dâ!
Ipasalida na ang Hanggang Kailan sa Miyerkules, Pebrero 6.
•••
Mora kog naugbok kadiyot pagkadungog nako adtong Miyerkules sa balita nga namatay ang sikat nga mag-aawit nga si James Ingram. Nakaingon ko: How Do You Keep The Music Playing, Just Once, Somewhere Out There?
Bitaw, pila lang kini sa mga kantang gipasikat ni James. Pahulay sa kalinaw, Idol!