NAKATILAW na ka og dragon fruit? O kaha nakakita na niini? Ang dragon fruit (scientific name Pitaya o Pitahaya sa Cactaceae family) abunda sa probinsya sa Aklan sa Western Visayas apan adunay dragon fruit farm dinhi sa Sugbo.
Nahimong atraksyon karon sa mga lokal nga turista ang dragon fruit farm sa Delcio’z Resto Cafe nga nahimutang sa lungsod sa Ronda.
Gipanag-iya kini sa magtiayong Maximino ug Elma Alayacyac, kinsa mga taga Aklan.
Matod ni Maximino, niadtong 2015 pa sila nagtanom og dragon fruit.
“Ang akoang pagtanom kanang tanom lang gud. Wala gani mi ideya nga ibaligya. Ang importante makatanom lang mi para sa amoang pangkunsomo.
Hangtod nga manghunong man ang mga sakyanan dinhi, sige papiktyur... so maayong tamnan pa gyud ni da kay daghan man magpapiktyur,” matod ni Maximino.
Matod ni Maximino nga dragon fruit ang ilang gipili nga tamnon sanglit wa kini naila sa Sugbo.
Nauyonan sab sa magtiayon nga magpatukod og cafe alang sa mga mobisita sa farm. Niadto lang Septiyembre 2018 ilang gitukod ang Delcio’z Resto Café.
Ang Delcio’z gikan sa mga ngalan nga Delfina ug Ambrocio, mga ginikanan ni Maximino.
Sa pagkakaron aduna nay 1,000 ka mga punuan sa dragon fruit sa tulo ka ektarya nga darohan (farm) nila ni Maximino.
Abril hangtod Septiyembre ang tempo sa pagpamunga niini.
Apan bisan sa mga buwan nga dili tempo, makapamunga gihapon kini tungod sa suga nga gimuntar ni Maximino palibot sa tagsa-tagsa ka mga punuan.
Usa ka tropical fruit ang dragon fruit maong dili kini gikinahanglang bisbisan matag adlaw, inay abunohan lang kini.
Ang kaniadtong awa-aw nga bahin sa Ronda, karon dagsaon na sa mga turista tungod sa dragon fruit.
Awhag lang ni Maximino sa mga bisita nga ampingan ang mga tanom ug dili hikapon ang mga buwak kon magpapiktyur.
Sa pagkakaron, walay entrance fee ang dragon fruit farm. Libre pud ang parking.
Dili sab kini abli sa publiko. Ang mga kustomer ra sa Delcio’z Resto Café ang pwedeng makapapiktyur sulod sa umahan.
Gawas nga ma-relax ka sa view, matambalan sab ang imong kauhaw sa ilang gitanyag nga dragon fruit shake nga tag P90.
Makapalit sab ka og bag-ong pupo nga dragon fruit sa P280/kilo nga adunay tulo ka kolor: magenta, puti ug yellow.
Alang sa kadtong magdala og sakyanan, adunay lapad nga parking area ang Delcio’z.
Abli kini 8 a.m.- 9 p.m.
Nahimutang ang Delcio’z resto café sa utlanan sa mga lungsod sa Dumanjug ug Ronda. Tulo ka oras biyahion gikan sa dakbayan sa Sugbo kon way grabeng trapik.