GIABLIHAN na sa Huwebes, Enero 31, sa Vicente Sotto Memorial Medical Center (VSMMC) ang labing unang Human Milk Bank sa Sugbo.
Ang pagbukas gipanguluhan ni kanhi senador Pia Cayetano, kinsa maoy nigahin og pundo sa maong pasilidad.
Usa kini ka pasilidad nga punduhanan, mokolekta ug moproseso sa human milk, nga gipundohan mismo ni Cayetano.
Nahimo kining usa sa mga adbokasiya ni Cayetano human niya nasinati ang dakong tabang sa “breast milk” ngadto sa iyang ikatulong anak nga mitaliwan na tungod sa congenital condition ug mao kini usa sa mga hinungdan nga mitabang siya sa pagpa tukod sa maong milk bank.
“When my baby was born, he would only live for a few days and in fact, madami ang nagsabi sa amin na wag nalang akong mag breastfeed kasi mamatay lang siya. Pero third ko na yun eh, kaya naisip ko na yung dalawang older kids ko na breastfeed ko, why not this one na nangangailangan? So, it turned out my son was a fighter, he was living the next month, the next month, and that’s why sobra akong naging advocate (sa breastfeeding,” matod ni Cayetano.
Subay ni Cayetano nga iyang gipaambit ang iyang kasinatian bahin sa nahitabo sa iyang anak para sa pagpahinumdum sa mga inahan kon unsa ka importante ang breast milk sa mga bata.
Siya nagkanayon nga dako sab ang tabang sa Milk Bank ngadto sa mga inahan nga di makapagawas sa ilang kaugalingon nga gatas.
“I used that to encourage other mothers to breastfeed, and also for the mothers who are in need of help, who cannot produce their milk.” subay ni Cayetano.
KON MODONAR
Si Dr. Amanda Du sa VSMMC nibutyag nga ang mga modonar nga inahan, kinahanglan pa mopailawom sa screening aron masuta kon wala ba kini sakit sama sa human immunodeficiency virus (HIV) ug uban pa.
Kon kwalipikado na kini sa pagdonar, ang makuha nga gatas iproseso ug ibutang sa temperatura nga negative 20 degrees Celsius nga freezer aron molungtad hangtod sa unom ka buwan.
“First, we have to interview mothers, see if they are actually qualified to donate milk, to see if they don’t have diseases, like HIV and such. Once they are qualified to donate milk, so you get milk from them and then preferably pasteurize through pasteurization process with the machine and then after that we freeze this milk,” pagpasabot ni Du.
Si Du mibutyag nga prayoridad sa VSMMC ang ilang pasyente, apan iyang giklaro nga bukas sila motabang ngadto sa ubang nanginahanglan gawas sa ilang tambalanan.
“Well, first things first. We have to address our hospital needs of course, and if our supply goes beyond what is needed in our hospital, then, yes we can potentially cater to those outside. But since here in our institution we have a need, we have to address that need first. That’s our first priority, “ sigon ni Du.