BANTAYAN sa kapulisan sa Police Regional Office (PRO) 7 ang mga dagkong simbahang Romano Katoliko ug mga mosque sa Central Visayas (CV) human sa sunodsunod nga pagpamomba sa Jolo, Sulu ug sa Zamboanga City nga mikalas og daghang kinabuhi.
Tungod niini, nipagawas dayon og kamandoan si Chief Supt. Debold Sinas, direktor sa PRO 7, sa tanang pulis sa CV nga hatagan og seguridad ang mga dagkong simbahan sa tibuok rehiyon.
Ilabi na ang Basilica Minore del Santo Niño nga daghang mga katoliko ang manimba matag domingo kini nunot sa nahitabong sunodsunod nga pagpa momba sa usa ka Cathedral sa Jolo Sulu nga mikalas nag daghang kinabuhi.
Matod ni Sinas nga kung unsa man ang hukom sa kadagkoan sa simbahan sama sa pagdili sa pagpasulod sa back pack ila kining ipatuman.
“Now there is a directive to secure major churches during services, so one of the most important church we have is the Basilica, kung dili gusto sa mga pari didto nga naay back pack we will abide, we will strengthen among security didto,” matod ni Sinas.
Apan dili lang ang simbahan sa katoliko ang ilang bantayan lakip na ang mga mosque sa mga Muslim sa syudad sa Sugbo ug Lapu-lapu tungod usab sa paglabay og granada sa usa ka mosque sa Zamboanga.
Aduna nay inisyal nga panag-estorya ang PRO-7 sa mga elders sa Muslim community ug giingong mipasalig kini nga moabag sila sa pag-monitor sa ilang hanay kung adunay mga bag-ong moabot nga kadudahan ang linihukan.
Magtagbo usab ang tulo ka mayor sa probinsya sa Sugbo diin ang ilang lungsod naapil sa travel advisory sa nasud sa United Kingdom ug United States of America.
Uban ang Central Command, Philippine Coast Guard, Department of Tourism ug National Intelligence Coordinating Agency aron i-assess ang kahimtang sa siguridad sa rehiyon 7.
Giklaro hinuon sa PRO-7 ug sa Central Command nga wala pay direktang hulga ang Sugbo sa planong paglusad ug teroristang pagpangatake.
Apan tungod kay ang Sugbo duol man sa Mindanao kanunay gyud nga malakip sa travel advisory sa mga nasud gumikan sa daghang turista dinhi.
BACKPACK
Giawhag karon sa Lapu-Lapu City Police Office (LCPO) ang mga manimbahay sa mga simbahan sa dakbayan sa Lapu-Lapu nga kung mahimo dili magdala ug mga backpacks sa higayon nga mosimba o moduaw sa simbahan.
Kini aron kalikayan nga malangay sa ipahigayong mga security check sa kapulisan sa entrada sa mga simbahan sa dakbayan.
Gibutyag ni Senior Superintendent Limuel Obon ang director sa LCPO nga sugod kagahapon, Enero 31, iya nang gimandoan ang mga hepe sa nagkadaiyang police stations diin adunay simbahan sa pagbutang na ug mga pulis nga motabang sa ipatumang security check.
Ang dili mosugot nga hilingon ang dala niining bag sa higayon nga mosulod sa simbahan did-an gayud nga makasulod sa mga simbahan.
Gipasalig ni Obon nga aduna silay igong personnel nga motabang pagbantay sa lima ka simbahan sa dakbayan hilabi na ang nabantog na nga simbahana sa Birhen sa Regla maoy sagad hugopan sa mga deboto sa dakbayan.
Gawas sa simbahan ipatuman usab ang subsub nga police visibility sa mga dapit sa dakbayan nga sagad adunay mga tawo sama sa mga malls, resorts ug uban pa.
Wala man tuoy direktang hulga sa seguridad apan gusto lang si Obon nga dili mikompiyansa sa mga dautang elementong mobuhat unya ug kasamok sa dakbayan sama sa pagpamomba.
Kagahapong adlawa, nakigtagbo si Obon kang Lapu-Lapu City Mayor Paz Radaza ug sa Tourism Officer sa dakbayan nga si Hembler Mendoza aron mahan-ay ang ipatumang seguridad sa dakbayan nunot sa nahitabong pagpamomba sa Jolo, Sulu nga posibleng makaapekto usab unya sa turismo sa dakbayan.
“Sa atoa diri nga i-discourage lang nato kay naa man gyud kanang mohapit lang sa simbahan and then naay lain tuyo so they had their choice kung dili nila e-submit themselves para e-check dili sila pasudlon” pagpasabot ni Obon.
Ang tourism officer sa dakbayan nga si Hembler Mendoza nabalaka sa posibleng epekto unya sa turismo sa dakbayan sa padayong pagpagawas ug mga travel advisory sa ubang nasod mahitungod sa habagatang bahin sa nasod human sa nahitabong pagpamomba sa Jolo,Sulu.
Sumala pa niya nga dli gayud kalikayan ang kahadlok sa pipila ka mga turista kung maghisgot ta’g hulga sa pagpamomba hinungdan nga mas maayong mopahugot gayud sa ilang seguridad ang mga resort sa dakbayan.
Sa pagkakaron wala pa hinuon makadawat si Mendoza ug taho nga adunay nipakanselar sa ilang mga booking sa mga resort sa dakbayan gumikan sa nahitabong pagpamomba sa Jolo, Sulu.
“Nakaapekto na siya sa pagkatawo nato kay i mean moingon ta’g naay bombing within the Philippines naa gyud kay second thought mao nang mangandam ta” matod ni Mendoza.
Si Mayor Paz Radaza sa iyang bahin miawhag sa mga kadagkuan sa mga resorts ug mall sa pakig-alayon gayud sa kapulisan alang sa mga ipatumang lakang pagpahugot sa seguridad sa ilang mga estbalisimento.
Nasayran nga tigomon sa kapulisan ang mga nanag-iya ug resort ug mall karong adlawa Pebrero 1 aron hisgotan ang posibleng mga lakang nga ipatuman aron masigurong magpabiling luwas ang publiko sa mga dautang elemento. (AYB, GCM, Correspondents)