MING-UMENTO na ang sweldo sa mga job order ug contract of services nga mga empleyado sa Kapitolyo, apil ang mga doktor nga nangalagad sa mga provincial ug district hospitals.
Sa Executive Order No. 1-2019 ni Gobernador Hilario Davide III nga giluwatan niadtong Enero 16, 2019, iyang gimando ang pagpatuman sa ikaupat nga tranche sa usbaw sa suhulan sa mga doktor sa mga provincial ug district hospitals nga na-hire isip job order o contract of service (COS) personnel.
Samtang, ang mga JO ug COS nga mga kawani nga di mga doktor, makatagamtam usab og umento sa sweldo apan ubos sa third tranche ang ilang rate.
Ang usbaw epektibo sugod niadtong Enero 1, 2019.
NGANONG GIUMENTUHAN
Si Provincial Budget Officer Danilo Rodas nibutyag nga tuyo nga gipausbawan og dako ang sweldo sa mga doktor gumikan sa higpit nga competition tali sa pribadong mga tambalanan.
“Ang atong purpose ani nga makakuha ta og mga competent doctors nga di manghawa sa atong hospitals, kay gikinahanglan man ang mga doctor. Kasagaran manghawa ang doctors kay pila ra may sweldo sa atua,” pasabot ni Rodas.
Siya nipasabot kritikal ang gimbuhaton sa mga doktor hinungdan ang Provincial Health Office nirekomendar nga patas-an ang ilang mga sweldo labi na wa silay mga benepisyo ug bonus gikan sa Kapitolyo.
Ubos sa balaod ug mga lagda, way employer-employee relationship tali sa hiring agency, ang Kapitolyo ug ang mga j.o. ug COS personnel, hinungdan nga wa kini mga benepisyo sama sa natagamtaman sa regular ug casual nga mga kawani sa Provincial Government.
Matod ni Rodas, kaniadto gagmay ang sweldo sa mga j.o. nga mga kawani apan tungod kay manghawa gumikan sa higpit nga kompetition tali sa pribadong mga kompaniya, ilang giumentohan ang sweldo.
Sigon niya, ilang giapas ang sweldo sa mga doktor sa rate sa regular nga mga doktor gumikan sa grabe usab nga kompetition tali sa pribadong mga tambalanan.
Niadtong Enero 1, 2019 usab, niepekto ang ikaupat nga tranche sa umento sa suhulan sa regular ug casual nga mga empleyado sa gobiyerno, subay sa Executive Order No. 201 ni kanhi Presidente Benigno Aquino III niadtong Pebrero 19, 2016.
Si Rodas nidugang moabot sa 1,600 ang mga j.o. ug COS nga mga kawani nga nanarbaho ubos sa kagamhanan sa lalawigan sa Sugbo.
Ang adjustment sa sweldo i-charge sa tinuig nga budget sa Kapitolyo alang sa 2019 base sa pagtugot sa Appropriation Ordinance No. 2018-21.(SCG)