SA IKAWALONG higayon, nakahulma na usab ni Nikola Jokic og triple-double sa nagpadayon nga season human kini mipakatap og 20 puntos, 13 ka rebounds ug 10 ka assists aron ituboy ang Denver Nuggets ngadto sa 105-99 nga kadaugan batok sa New Orleans sa National Baskeball Association (NBA).
Midugang og 22 puntos si Malik Beashley, 20 usab gikan kang Monte Morris nga nakatabang usab sa Northwest Division leader Nuggets sa ikaupat nga nagkutay nga daog.
Human naggukod, 53-56, sa halftime, ang Denver mibugwak og 10-0 nga rally sa pagsugod sa third quarter aro sakmiton ang komportabling bintaha nga mibukad ngadto sa 11 puntos.
Apan ang Pelicans wa moisa sa ilang bandera ug sa tinguha nga makapakaging sa Nuggets, sama sa ilang gihimo sa Houston Rockets niadtong Martes, hinayhinay nga mikitkit sa labaw ug tuod man nakasikit kini pagbalik.
Si Kenrich Williams mitali og lima ka triples ug mitalig career-high nga 21 puntos alang sa Pelicans kinsa midula nga sa ikaduhang higayona wala ang pipila ka mga starters ug ang ilang top reserve.
Ang step back ni Jrue Holiday, kinsa adunay 22 puntos, mihulga sa Denver, 100-99, sa katapusang 1:32 segundos sa duwa.
Apan ang kabangis ni Jokic sa ilawom nga bahin bisan pa man sa hugot nga depensa ni Jahlil Okafor maoy nagwanang sa kadalanan sa Nuggets ug gikan niadto wala nay nahimo pa ang Pelicans.
Samtang sa laing duwa, daw og sa gibayaw sa himaya si Karl-Anthony Towns human kini mipuga og 16 puntos sa second half, lakip na niini ang iyang desperadong itsa nga maoy miaswat sa Minnesota Timberwolves batok sa Memphis Grizzlies, 99-97.
Sa katapusang posisyon sa Minnesota, ang bola diha ni Andrew Wiggins ug hinayhinay nga mipatay sa oras ug sa katapusang sais minutos misuway kini sa pag-itsa.
Nasipyat man tuod apan nakuha ni Towns ang bola sa wala nga bahin ug gi-dribble kini og kausa dayon mi fade-away nga maoy nakapadaog sa Minnesota.
Sa ubang mga duwa, gimakmak sa Boston Celtics ang Charlotte Hornets, 126-94, bisan og wala si Kyrie Irving; gipawong sa Chicago Bulls ang kainit sa Miami Heat, 105-89.
Gilubong usab sa Dallas Mavericks ang New York Knicks, 114-90, gibuntog sa Washington Wizards ang Indiana Pacers, 107-89.
Gipawong sa Portland TrailBlazers ang sonata sa Utah Jazz, 132-105 samtang gibalian sa Sacramento Kings og pako ang Atlanta Hawks, 135-113, (JBM)