GIRONDA sa mga sakop sa City Mobile Force Company sa Cebu City Police Office Huwebes sa kaadlawon, Enero 31, ang duha ka poker house nga walay permit sa Philippine Amusement and Gaming Corporation sa Barangay Guadalupe ug Kamputhaw sa syudad sa Sugbo.
Ang pagpang-ronda pinasikad sa search warrant nga giluwatan nilang Regional Trial Court (RTC) Judge James Stewart Ramon Himalaloan sa Branch 7 ug Amory Nueva of Branch 13 Regional Trial Court sa Syudad sa Sugbo.
Ang target sa search warrant mao ang Chinese national nga si Chuck Leonard Lai nga maoy giingung nagpadagan sa illegal poker house sa Barangay Guadalupe ug ang laing target mao ang Ralphs Wines and Spirit Building nga nahimutang sa Morales Street, Barangay Kamputhaw.
Moabot ngadto sa 22 ka mga tawo ang nadakpan nga naglangkob sa mga naabtan nga nanugal sa poker games lakip na ang mga trabahante niini nga naaktohan nga nag deal og poker cards.
Matod ni Chief Inspector Chuck Barandog, hepe sa City Mobile Force Company, nga maoy team leader sa raiding team nga moabot sa kapin P600,000 nga balor sa mga poker chips ang ilang nasakmit ug mga gamit niini saka sa computer ug uban pa.
Kapin sa usa ka semana nila nga gipanid-an ang illegal gambling activities sa maong mga lugar ug sa dihang nag-positibo, mi-apply dayon sila'g search warrant sa korte. Sa monitoring sa kapulisan, dili mga yanong tawo ang manugal sa duha ka illegal poker house sanglit adunay mga tag-as nga opisyal sa gobyerno ang nasigpatan nga mosulod arin manugal.