MOKABAT sa P23.5 milyones nga balor sa pirated nga mga compact disc (CD) ug digital video disc (DVD) sa nagkadaiyang salida, local ug international ang nasakmit sa Optical Media Board (OMB) gikan sa dul-an 10 ka stalls sa karaang merkado sa Barangay Centro, dakbayan sa Mandaue.
Ang operation sa OMB, tinabangan sa mga pulis sa Mandaue City Police Office, gihimo alas 9:30 sa gabii sa Huwebes, Enero 31.
Moabot og 168 ka mga sako sa maong nasakmit nga pirated CD’s ug DVD’s.
Ang operasyon pinanguluhan ni OMB agent Glen Perez, kinsa nakig-alayon sa kapulisan sa MCPO alang sa operasyon, human sa gihimo nga mga surveillance sa nagkadaiyang dapit sa Dakbayan sa Mandaue, sud sa pipila ka adlaw.
Gitug-an sa tigpamaba sa MCPO, Chief Insp. Mercy Villaro, nga lain pa unya nga pag-pang-raid sa ubang mga lugar sa Syudad nga giila na sa OMB sa mga mosunod nga adlaw o semana.
“Ang taga OMB gyud mismo nihimo una sa ilang pag-surveillance sa syudad ug sa dihang nakita nila nga rampant gyud, daghan ni sila nga namaligya og pirated, kagahapon (Enero 31), niduol ni ilang OMB Agent dinhi sa MCPO, alang sa police assistance ug pag-secure sa ilang operatiba nga nihimo sa operation,” tug-an ni Villaro sa Superbalita Cebu.
Walay mga tawo nga nasikop atol sa operasyon, ilabi na nga kasagaran sa mga anaa, mga nagbantay lang ug di tag-iya.
Ang uban usab, matod ni Villaro, dali nga nakadagan palayo sa lugar.
Ang mga sinako nga pirated DVD ug CD anaa pa sa buhatan sa MCPO kay gamiton kini sa OMB isip ebidensya sa kompanya o indibidwal nga nanag-iya sa maong mga pirated, alang sa pagpasaka sa kaso, una panggub-on.