LUGWAYAN sa Department of Foreign Affairs (DFA) ang ilang pag-istar sa dakbayan sa Sugbo aron sa pag-asikaso sa gustong molukat ug mo-renew sa ilang mga pasaporte.
Si Konsehal Raymond Alvin Garcia nagkanayon nga unang gipahibawo sa DFA nga magsugod ang Passport on Wheels (PoW) karong Pebrero 4 hangtod 28.
Mao sab kini ang gipahibawo sa DFA sa ilang social media account. Apan kagahapon sa buntag, gikompirmar ni Garcia nga hangtod sa Marso 2 magpabilin sa SM Seaside City ang PoW aron pagdawat sa aplikasyon sa hilabi na sa mga Sugbuanon sanglit napanglantawan nga modagsa pa ang daghang mga tawo.
Matod ni Garcia nga nagkahinabi sila ni Secretary Michael Dino sa Office of the Presidential Assistance for the Visayas, kinsa maoy naningkamot nga madala ang POW sa Sugbo.
Gipahibawo ni Garcia nga di maapektohan ang operation sa DFA-Cebu sanglit ang mga personnel sa POW gikan pa mismo sa ilang Central Office.
Ang nag-atiman kanila mao ang OPAV lakip ang pagpangita og venue nga haom alang sa kinabag-an.
Ang konsehal sa north district nagkanayon nga napanglantawan ni Dino nga daghan ang modagsa gikan sa Cebu City ug silingang mga siyudad ug lungsod lakip na ang kanait nga probinsya sama sa Bohol ug Negros.
Iyang gipahibawo nga subay sa kapasidad sa POW, adunay labing daghan 1,200 ka mga aplikante ang maatiman matag adlaw gikan sa Lunes hangtod sa Sabado ug mopahuway sa Dominggo.
UNSAY GIKINAHANGLAN
Ang bag-ong mga aplikante kinahanglan nga adunay confirmed online appointment (COA), personal appearance, accomplished application form, orgininal copy of Philippine Statistics Authority Authenticated Birth Certificate on Security Paper, ug valid identification (ID) card nga giisyu gikan sa gobiyerno. / (PAC)