MOSUWAY pagbawi gikan sa kapildihan ang Cebu City Sharks sa ilang pagpakigbatok sa Bulacan Kuyas sa premirong duwa karong gabii sa Maharlika Pilipinas Basketball League (MPBL) Datu Cup sa Angeles University Foundation (AUF) gym sa Pampanga.
Ang Sharks gikan 67-75 nga kapildihan batok sa Mandaluyong El Tigre niadtong Enero 26 sa miaging tuig nga maoy nagputol sa ilang upat ka sunodsunod nga kadaugan.
Ning maong kapildihan, nabutang sa delikado nga posisyon ang poruhan sa Sharks alang sa nagkaduol nga playoffs.
Ang Sharks, nga aduna na la’y tulo ka nahabiling mga duwa, kasamtangang nagkumpayot sa ikapitong luna sa South division bitbit ang 10-12 nga rekord.
“Para makaseguro gyud ta’g sulod sa playoffs, must-win ta aning last three games nato. Gipangandaman gyud ni nato’g maayo,” matod ni Sharks coach Norberto “Titing” Manalili.
Ang mopatigbabaw nga walo sa South ug hasta sa North division mao ang makasulod sa playoffs.
Aduna gihapon hinuon poruhan nga makasulod sa playoffs ang Sharks bisan dili nila maharos pagdaog ang katapusan nilang tulo ka mga duwa apan nagdepende na sa resulta sa ubang mga kombati.
“Kinahanglan gyud ni natong dag-on ang last three games nato. Dili ta magdepende sa duwa sa ubang teams kay wala gyud makahibalo unsay resulta. Ang among depensa, nga maoy among strength, amo gyud gipraktis og maayo,” dugang ni Manalili.
Sa ilang bahin, ang Kuyas nga ubos sa pagdumala sa Sugboanong coach nga si Britt Reroma kasamtangang naglingkod sa ikalimang puwesto sa North division dala ang 13-8 nga rekord.
Anaa usab ang mga kanhi Cebu-based players nga sila si Wowie Escosio, nga kanhi PBA player nga sila si Jason Melano ug Jerrick Canada, Jan Colina ug Rev Diputado,
Taas og moral ang Kuyas ning sangkaa gumikan kay gikan kini sa duha ka sunodsunod nga kadaugan batok sa Caloocan Supremos, 86-82, ug Pasig Pirates, 102-96.
Sa main game, magsangka ang host Pampanga Lanterns batok Mandaluyong El Tigre. (ESL)